რა დააქვთ ბავშვებს სკოლებში - მანდატურის სამსახურმა ერთ წელიწადში 96 000-ზე მეტი დარღვევა აღრიცხა

2017-2018 სასწავლო წლის მანძილზე, სკოლებიდან 176 ერთეული მაღალი რისკის შემცველი ნივთია ამოღებული, მათ შორის დანა, ბასრი საგანი და კასტეტი, - ამის შესახებ "ინტერპრესნიუსს" საქართველოს განათლების, მეცნიერების, კულტურისა და სპორტის სამინისტროს სსიპ საგანმანათლებლო დაწესებულების მანდატურის სამსახურისგან გამოთხოვილი საჯარო ინფორმაციის საპასუხოდ აცნობეს.

მანდატურის სამსახურის ინფორმაციით, სულ, 2017-2018 სასწავლო წელს სკოლებში 96 084 დარღვევა გამოვლინდა.

"96 084 დარღვევიდან 83 066 არის ისეთი დისციპლინური გადაცდომა, როგორიცაა: მოსწავლის დილის დაგვიანება, გაკვეთილის ჩაშლა, გაკვეთილის ჩაშლის მცდელობა, გაკვეთილიდან გაპარვა, მობილური ტელეფონით სარგებლობა. ამასთან, 2017-2018 სასწავლო წლის მანძილზე, ამოღებულია 176 ერთეული მაღალი რისკის შემცველი ნივთი, მათ შორის დანა, ბასრი საგანი და კასტეტი. საგულისხმოა, რომ თითოეული მსგავსი შემთხვევის თაობაზე ეცნობა საქართველოს შინაგან საქმეთა სამინისტროს შესაბამის სამსახურებს",- აღნიშნულია სსიპ მანდატურის სამსახურის მიერ "ინტერპრესნიუსისთვის" გამოგზავნილ წერილში.