ჰონენსის საერთაშორისო საფორტეპიანო კონკურსის გამარჯვებული ქართველი პიანისტი, ნიკა ნამორაძე გახდა.
კონკურსი სამ წელიწადში ერთხელ იმართება და მსოფლიოში ერთ-ერთ ყველაზე პრესტიჟულ მუსიკალურ ღონისძიებად მიიჩნევა. გამარჯვებული კი 100 ათას დოლარს და ხელოვნის განვითარების პროგრამას (500 ათასი დოლარი) იგებს.
ნამორაძე თბილისში დაიბადა. Georgian Journal-თან ინტერვიუში მან განაცხადა, რომ ის ჯერ მხოლოდ 2 თვის იყო, როდესაც ოჯახი ბუდაპეშტში გადავიდა საცხოვრებლად.
„საქართველოში იშვიათად ჩამოვდივარ, თუმცა სამშობლო ძალიან მნიშვნელოვანია ჩემთვის. აღტაცებული ვარ ქართული კულტურით, ფოლკლორით, რომელიც, დარწმუნებული ვარ, მსოფლიოს მუსიკალურ საოცრებებს შორის არის. მას, ასევე, დიდი გავლენა აქვს ჩემს მუსიკაზე,“ - აღნიშნავს ნიკა ნამორაძე.