"პატრიარქის პოზიციაა, რომ მარიხუანასთან დაკავშირებული კანონპროექტი არ შეიძლება მიიღონ" - რა მოთხოვნები აქვთ სასულიერო პირებს

პატრიარქის პოზიცია ზუსტად ასეთია, რომ ეს კანონპროექტი არ შეიძლება იყოს მიღებული. ამის თაობაზე პატრიარქი კვირას თავის ქადაგებაში იტყვის, - ამის შესახებ ჟურნალისტებს მამა შალვა კეკელიამ განუცხადა.

მამა შალვას თქმით, კვირას, მრევლი იკრიბება სამების ტაძარში, სადაც პატრიარქი პარაკლისს გადაიხდის და "ამის შემდეგ დაანონსდება ყველაფერი".

"როდესაც ეს გადაწყვეტილება საკონსტიტუციო სასამართლომ მიიღო, პატრიარქმა განაცხადა, რომ ეს არის დიდი ბოროტება, მტრობა ქვეყნისა. ანუ ოთხმა ადამიანმა, რომლებმაც ეს მიიღო, ეს იყო ქვეყნის მტრობა იყო. წარმოიდგინეთ, არანაირი რეგულაციები არ იყო დაწესებული, ისე მიიღეს ეს გადაწყვეტილება. ანუ ჯერ კანონი მიიღეს და მერე იწყებენ საუბარს, რა რეგულაციები მიიღონ. ეს ხომ მძიმე მდგომარეობაა", - განაცხადა მამა შალვამ.

მისივე თქმით, მოსახლეობის 90%-ს ამ კანონპროექტის მიღება არ უნდა.

"თბილისის სამღვდელოების ნაწილი სამებაში შევიკრიბეთ. მრევლი გვესაუბრება, თუ რა პოზიცია გვაქვს მარიხუანას კულტივაციასთან დაკავშირებით და დაგვიდგებით თუ არა გვერდზე? ჩვენ მოსახლეობას მხარდაჭერას ვუცხადებთ, მოსახლეობის 90%-ს ამ კანონის მიღება არ უნდა. არ უნდა, რომ ჩვენს ქვეყანაში მოხდეს მარიხუანას კულტივაცია, ამას არ აქვს მნიშვნელობა სამედიცინო მიზნით იქნება თუ იმ მიზნით, რომ ჩვენს ქვეყანაში შემოსავალი შემოვა. ასეთი შემოსავალი არ გვჭირდება. რაც შეეხება დეკრიმინალიზაციას, ეკლესია არ ამბობს, რომ ადამიანები უნდა დაიჭირონ მარიხუანას გამო. ამის გამო არ შეიძლება იჭერდნენ ადამიანებს და ციხეში სვამდნენ. სახელმწიფომ ყველაფერი უნდა გააკეთოს იმისთვის, რომ შეიქმნას სარეაბილიტაციო ცენტრები. რა მოხდა ამ კანონის მიღების შემდეგ - პირიქით, გამრავლდა ამ ნარკოტიკის მომხმარებელთა რაოდენობა. როდესაც მეტადონის პროგრამა დაწესდა ჩვენს ქვეყანაში პირობა იყო, რომ მეტადონის პროგრამა შეამცირებდა ნარკოტიკების მომხმარებლების რაოდენობას. თქვენ შეგიძლიათ გაეცნოთ ამ პროგრამას, თუ მეტადონის პროგრამაში თავიდან 500 კაცი შევიდა, დღეს ამ პროგრამაში არის 50 000 ადამიანი, ანუ ემატება მომხმარებელთა რაოდენობა", - განაცხადა მამა შალვამ.

მისი თქმით, სასულიერო პირები არ შეეგუებიან იმ კანონის მიღებას, რომელიც მარიხუანას კულტივაციას გულისხმობს ექსპორტის მიზნით. მისივე განცხადებით, რაც ამ კანონპროექტის შესახებ გახდა ცნობილი, მრევლი კითხვით მიმართავთ, თუ რა ხდება.

"საკონსტიტუციო სასამართლომ მიღებული გადაწყვეტილებით პიროვნების თავისუფლების განვითარების უფლებაში ნარკოტიკული ნივთიერება მარიხუანა მოხმარებაში შეიყვანა. ეს ნაჩქარევი და საფრთხეების შემცველი გადაწვეტილებაა. შექმნილი პრეცედენტი საშიშროებას ქნის, რომ მომავალში სასამართლომ სხვა სახის ნარკოტიკებით ან ადამიანის ჯანმრთელობისთვის საზიანო რაიმე ქმედებებით, იგივე ლოგიკით დააკანონოს. გაუგებარია, რატომ მოხდა მარიხუანას კულტივაციის შესახებ კანონპროექტის გასაიდუმლოებულად შემუშავება, საჯარო განხილვების გარეშე. როდესაც ამ კანონპროექტის არსებობის შესახებ ცნობილი გახდა, ხელისუფლების მაღალი თანამდებობის პირები აცხადებდნენ, რომ ეს გადაწყვეტილება აუცილებლად იქნება მიღებული. ანუ უკვე ჩვენი მოსახლეობის ნების გარეშე ვიღაცებმა გადაწყვიტეს, რომ ეს ასე იქნება. მიუხედავად იმისა, მოსახლეობას ამის მიმართ რა დამოკიდებულება აქვს, ხელისუფლება გვეუბნება, რომ ამას უჭველად გადავწყვეტთ. ამიტომ მოვუწოდებთ ყველა იმ ადამიანს, რომ ეს კანონი ასე არ იყოს მიღებული. ჩვენს ქვეყანას არ სჭირდება კაზონოებით, ნარკოტეკებით შემოსული ფული. ჩვენ გვაქვს ისეთი რესურსი, რომ უამრავი რამ შეგვიძლია განვავითაროთ, რითაც ჩვენი ქვეყანა სიღარიბის ზღვარს გადაცდება. სახელმწიფო ისეთი რამით უნდა დაგვეხმაროს, რაც აუცილებელია, თუნდაც სოფლის მეურნეობის განვითარებით. ჩვენს ქვეყანაში ჩამოსულ ტურისტებს საკვები სჭირდებათ და არა მარიხუანას მიწოდება", - განაცხადა მამა შალვამ.

ჩვენ არსად არ ვიშლებით, ველოდებით ხალხს. ეს გამოსვლა არ უნდა იყოს გამოსვლა გამოსვლისთვის, - ამის შესახებ მამა დავით ისაკაძემ თბილისის საკრებულოსთან განაცხადა, სადაც სასულიერო პირები არიან შეკრებილები.

სასულიერო პირები აცხადებენ, რომ ისინი ეწინააღმდეგებიან კანონპროექტს, რომელიც მარიხუანას წარმოებასა და ექსპორტს შეეხება.

"გაისმა მოწოდება დაშლისკენ. შეიძლება მავანთაგან ზეწოლის გამო სურვილი აქვთ, რომ აქ შეკრებილი საზოგადოება დაიშალოს, მე პირადად დაშლას არ ვაპირებ, არც ჩემი მრევლი", - განაცხადა მამა დავით ისაკაძემ.

საკრებულოს წინ შეკრებილმა სასულიერო პირებმა განცხადება წაიკითხეს და აღნიშნეს, რომ „არ მოხდეს კანონის იმ ნაწილის მიღება, სადაც მარიხუანას ლეგალურ კულტივაციაზეა საუბარი, რადგან ეს არის დამღუპველი ერისა და ქვეყნისთვის“.

მან ასევე ისაუბრა ამ პრობლემიდან გამოსავალზე.

"ვითხოვთ - პირველი, კონსტიტუციის შესაბამის მუხლში შევიდეს ისეთი ცვლილება, რომ თვითგანვითარება არ გულისხმობდეს თვითდაზიანებას. მეორე - არ მოხდეს კანონის იმ ნაწილის მიღება, სადაც მარიხუანას ლეგალურ კულტივაციაზეა საუბარი. ეს არის დამღუპველი ჩვენი ერისა და ქვეყნისთვის. ჩვენი ქვეყანა ამისათვის მზად არ არის და არც იქნება. ჩვენი მოსახლეობა ამას არ დაუშვებს. ამიტომ გადავწყვიტეთ სასულიერო პირებმა შეკრება, რომ მოსახლეობისთვის ეს გვემცნო. სასულიერო პირების დამოკიდებულება ასეთია - ჩვენ ამას არასდროს შევეგუებით", - განაცხადა მამა შალვამ.