ავტორი:

აჯობებს თუ არა თბილისის ანძა ეიფელს? - 2020 წლისთვის ანძაზე შესაძლოა, რესტორანი და სასტუმრო გაიხსნას

აჯობებს თუ არა თბილისის ანძა ეიფელს? - 2020 წლისთვის ანძაზე შესაძლოა, რესტორანი და სასტუმრო გაიხსნას

თბილისის ანძა, როგორც ეიფელი - 185 მეტრის სიმაღლის სატელევიზიო კოშკის განვითარების კონცეფცია დამტკიცებულია. მოძრავი იატაკი, რამდენიმე ნომრიანი VIP-სასტუმრო და ორ საართულიანი კვების ობიექტი - ანძის ტურისტულ ცენტრად ქცევასთან დაკავშირებით, ესტონური კომპანიის „კოკო არქიტექტორების“ კონცეფციამ გაიმარჯვა. ახლა მთავარი ფინანსების მოძიებაა და 2020 წლისთვის მთაწმინდის პარკი ტურისტებისთვის კიდევ უფრო მიმზიდველი გახდება.

მსოფლიოს მრავალ ქალაქში სატელევიზიო ანძებს ტურისტული დანიშნულებაც აქვს. მაგალითად, შანხაიში სატელევიზიო კოშკი Oriental Pearl ჩინეთის უდიდესი ქალაქის მთავარი ღირსშესანიშნაობაა, სადაც განლაგებულია სამუზეუმო სივრცე, საკონფერენციო დარბაზი და ერთ-ერთი საუკეთესო და ძვირადღირებული რესტორანი.

მსოფლიოში ცნობილია ბერლინის სატელევიზიო კოშკიც - Fernsehturm, რომელიც გერმანიის 10 მთავარ ღირსშესანიშნაობას შორისაა შესული. ანძაზე მოძრავი რესტორანი მდებარეობს, რომელიც მნახველს შთამბეჭდავ ხედებსა და გემრიელ სამზარეულოს სთავაზობს.

პარიზში მდებარე ეიფელის კოშკი კი მსოფლიოს ერთ-ერთი ყველაზე ცნობილი ტურისტული ატრაქციაა. მას ყოველწლიურად 5 მილიონზე მეტი დამთვალიერებელი სტუმრობს, გარდა სატელევიზიო და რადიო სიგნალების გადაცემისა, ანძაზე სამდონიანი სანახაობრივი სივრცეა მოწყობილი ტურისტებისთვის.

რაც შეეხება თბილისის სატელევიზიო კოშკს, ტენდერი ტურისტული ღირსშესანიშნაობის მოწყობის კონცეფციაზე "საქართველოს ტელერადიოცენტრმა" 2018 წლის აპრილში გამოაცხადა. ტენდერში ესტონურმა კომპანიამ „კოკო არქიტექტორებმა" გაიმარჯვა, რომელმაც ესკიზი მიმდინარე წლის აგვისტოში შესათანხმებლად მერიის არქიტექტურის სამსახურშიც წარადგინა, რაზეც სამსახურმა თანხმობა მისცა.

ესკიზის მიხედვით, "კოკო არქიტექტორებს" ანძის განვითარების ორი ვარიანტი აქვს შემუშავებული.

  • პირველი ვარიანტი:

ორსართულიანი სამკუთხედის ფორმის სივრცე, რომელიც აერთიანებს - რესტორანს, ბარს, ტექნიკურ ოთახებს სატელევიზიო კოშკისთვის, ლაუნჯს, ტერასას და საკონფერენციო ოთახს.

  • მეორე ვარიანტი:

ანძაზე წრიული ფორმის სივრცე მოეწყობა, რომელიც ორსართულიანი იქნება და გააერთიანებს - ბარს, რესტორანს, ლაუნჯს, საკონფერენციოს, ტექნიკურ ოთახებს სატელევიზიო კოშკისთვის.

კონცეფციის მიხედვით, ნავარაუდევია სივრცის გაფართოებაც, მაგალითად საუბარია, სასტუმროს ან სპა სასტუმროს მოწყობაზე. ამასთან, განიხილება წრიული მოძრავი იატაკის მქონე რესტორნის მოწყობაც. შემუშავებული ესკიზის მიხედვით, სატელევიზიო ანძაზე ორი ლიფტიც დამონტაჟდება.

"საქართველოს ტელერადიო ცენტრის" იურისტი ლაშა ჩალაძე ამბობს, რომ სატელევიზიო ანძის განვითარების იდეა უკვე რამდენიმე წელია არსებობს.

"ევროპის თითქმის ყველა განვითარებულ ქვეყანაში სატელევიზიო კოშკებს გარდა ძირითადი ფუნქციებისა, აქვთ დამატებითი პანორამული ფუნქცია, შესაბამისად ეს იდეაც აქედან გაჩნდა, თანაც საწარმოს დამატებითი შემოსავალიც გაუჩნდება. 2016 წელს ეკონომიკის სამინისტროში გაიგზავნა წერილი, სადაც იდეა მოგვიწონეს, ამიტომ ტენდერიც გამოვაცხადეთ. ტენდერი მიმდინარე წლის მარტში გამოცხადდა, რომლითაც ვითხოვდით წარმოედგინათ თბილისის სატელევიზო კოშკის განვითარების კონცეფცია. ტენდერში მონაწილეობა ორმა კომპანიამ მიიღო და საბოლოოდ გაიმარჯვა "კოკო არქიტექტორებმა".

ტენდერის პირობების მიხედვით ხუთ ეტაპად უნდა განხორციელებულიყო პროდუქტის მიწოდება. პირველ ეტაპზე უნდა მომხდარიყო ანძის ისტორიული კვლევა, შემდეგ მისი მდგრადობის შესწავლა და დიზაინური მონახაზი. წარმოდგენილ 4 ვარიანტიდან სახელმწიფოს მიერ ჩამოყალიბებულმა სატენდერო კომისიამ უნდა გამოავლინოს ერთი ყველაზე მისაღები ვარიანტი. შემდეგ დაპროექტებაზე გამოცხადდება სახელმწიფო შესყიდვა, სავარაუდოდ მომავალ წელს“ - უთხრა AMBEBI.GE-ს ლაშა ჩალაძემ.

მისივე თქმით, უსაფრთხოების მიზნით, კომპანიამ კონსულტაციები გაიარა კიევის ტექნიკურ უნივერსიტეტთან, რომელმაც თავის დროზე ანძა დააპროექტა.

"ტენდერში ერთ-ერთი მოთხოვნა იყო, შემუშავების პროცესში დამპროექტებელი კომპანიისგან მიეღოთ რეკომენდაცია, თუ რა დატვირთვას გაუძლებს თბილისის ანძა. აღნიშნული ინსტიტუტიდან მოვიდა ცნობა, რომ იდეის განვითარების დონეზე ამის განხორციელება შესაძლებელია. უბრალოდ, დეტალური კვანძების დატვირთის სიმძლავრის შესწავლა, საევაკუაციო გასასვლელის გაკეთება უნდა მოხდეს უშუალოდ მუშა პროცესების განხორციელებებისას.

უსაფრთხოების პარამეტრი ძალიან მნიშვნელოვანია შესაბამისად თითოეული სიმძიმე და გათვლები იქნება ტექნიკურად შემოწმებული. ვფიქრობ, შენობა ნაგებობის რეაბილიტაცია-რეკონსტრუქცია 2020-21 წლისთვის დასრულებული იქნება“ - გვითხრა ჩალაძემ.

185 მეტრის სიმაღლის სატელევიზიო ანძის რეკონსტრუქცია მთლიანობაში დაახლოებით 6-8 მილიონ ევრომდე ჯდება, ამიტომ „საქართველოს რადიო ცენტრი" ახლა ფინანსების ძიებაშია და სახელმწიფოს დახმარების იმედი აქვს.

"იქნებ კონკრეტული ინვესტორები გამოჩნდნენ, რომელიც ამ პროექტს განახორციელბს. სოლიდურ თანხებთან გვაქვს საქმე, ამიტომ ფინანსების მოძიება ერთ-ერთი მნიშვნელოვანი საკითხია. ეს არის სტრატეგიული ობიექტი, ამიტომ უსაფრთხოების პარამეტრი ჩვენთვის უმნიშნელოვანესია. ორგანიზაციამ ძირითადი ფუნქცია არ უნდა დაკარგოს.

მთელი კომუნიკაციის სისტემა, რომელიც საქართველოშია, დასხივების ძირითადი წყარო არის ანძა, აქედან გამომდინარე ყველანაირი რისკი უნდა იყოს შეფასებული, იგივე ინვესტორთან დაკავშირებით და ამის მიხედვით სახელმწიფომ უნდა განსაზღვროს საკუთარი პრიორიტეტები", - უთხრა AMBEBI.GE-ს ჩალაძემ.

"ბავშვის დედა კართან მუხლებზე მდგომი დამხვდა, სიტყვებს თავს ვერ უყრიდა" - სცენიდან ომში და ომიდან სამაშველო სამსახურში წასული ბიჭის ამბავი

"ბავშვის ოპერაცია 300 000 ევრო ჯდება და სანამ თანხას არ გადავურიცხავთ, არაფერს უკეთებენ" - პატარა ანიტას დახმარება სჭირდება

"ვაჟა გაფრინდაშვილი მონაწილეობდა 2008 წლის აგვისტოს მოვლენებში, როგორც ექიმი" - ე.წ.სამხრეთ ოსეთის დე ფაქტო КГБ