მეგანს ზიკას ვირუსის არ ეშინია - რისკის მიუხედავად, საშიშ ზონებში მაინც ჩავა

პრინცი ჰარისა და მეგან მარკლის 16 დღიანი მოგზაურობა ავსტრალიაში, ფიჯიზე, ტონგასა და ახალ ზელანდიაში გეგმის მიხედვით გაგრძელდება, ამის შესახებ გამოცემა People წერს. ტონგასა და ფიჯიზე ზიკას ვირუსის რისკია, თუმცა სასექსის ჰერცოგი და ჰერცოგინია ვიზიტზე უარს არ ამბობენ.

ორსულებს ხშირად ურჩევენ, თავი შეიკავონ იმ ქვეყნებში მოგზაურობისგან, სადაც ზიკას საშიშროებაა, რადგან ვირუსის შედეგად ნაყოფს, შესაძლოა, მიკროცეფალია და სხვა დაავადებები განუვითარდეს.

„დეილი მეილის“ სამეფო კორესპონდენტმა რებეკა ინგლიშმა „ტვიტერზე“ სასახლის წარმომადგენლების ინფორმაციაზე დაყრდნობით დაწერა, რომ წყვილმა ექიმებთან გაიარა კონსულტაცია და გადაწყვიტეს, რომ ფიჯისა და ტონგას მაინც ეწვევიან.

მეგან მარკლი და პრინცი ჰარი ავსტრალიაში გუშინ ჩაფრინდნენ. თვითმფრინავიდან გადმოსული ჰერცოგინია მუცელს იისფერი საქაღალდეთი მალავდა, რამაც მისი ორსულობის შესახებ ეჭვი კიდევ უფრო გააღრმავა. სულ მალე კი ბუკინგემის სასახლემ გაავრცელა ოფიციალური განცხადება, სადაც მარკლის ფეხმშიმობა დადასტურებული იყო - წყვილი შვილს 2019 წლის გაზაფხულზე ელოდება.