სოფო ხალვაში ბათუმის მერის მოადგილედ ინიშნება - მომღერლის კომენტარი
მომღერალი სოფო ხალვაში ბათუმის მერის მოადგილედ დაინიშნა. ხალვაში ოფიციალურად მერმა ლაშა კომახიძემ წარადგინა. როგორც მან აღნიშნა, სოფო ხალვაშზე არჩევანი იმიტომ გააკეთა, რომ მას კულტურის მიმართულებით დიდი გამოცდილება აქვს და ფართო ურთიერთობები აქვს ქვეყნის გარეთ, შესაბამისად, მომღერალი მერიაში კულტურის მიმართულებით იმუშავებს.
AMBEBI.GE კომენტარისთვის მომღერალს დაუკავშირდა:
"ბათუმის მერის მოადგილის პოსტზე შემოთავაზება არაერთხელ მივიღე ბათუმის მერისგან, ლაშა კომახიძისგან. დიდი ხანი ვფიქრობდი და მხოლოდ ახლა მივიღე გადაწყვეტილება. ვნახოთ, რა როგორ იქნება. ყველაფერს მაქსიმალურად გავაკეთებ ბათუმელებისთვის!
- სოფო, სალომე ზურაბიშვილის შემაჯამებელ შეხვედრაზე სიმღერის გამო, გაგათავისუფლეს აჭარის ტელევიზიიდან, რასაც ხმაური მოჰყვა... იქამდე მიიღეთ ბათუმის მერის მოადგილის პოსტზე შემოთავაზება თუ შემდეგ?
- მანამდეც მქონდა შემოთავაზებები, თუმცა ვფიქრობდი. ყოველთვის უარს ვამბობდი, არ ვიცოდი რამდენად ჩემი საქმე იყო, საბოლოოდ კი დამარწმუნეს შეგიძლიაო და ეს ნაბიჯი გადავდგი. ჩემი მთავარი პირობა იყო, სცენა და მიკროფონი არ დამეთმო, მითხრეს არც არავინ გთხოვს ამის დათმობასო და ვნახოთ რა იქნება" - გვითხრა ხალვაშმა.
შეგახსენებთ, ხალვაში აჭარის საზოგადოებრივი მაუწყებლის თანამშრომელი იყო, საიდანაც მას შემდეგ გაათავისუფლეს, რაც მომღერალმა "ქართული ოცნების" მხარდაჭერილი პრეზიდენტობის კანდიდატის, სალომე ზურაბიშვილის შემაჯამებელ წინასაარჩევნო შეხვედრაზე იმღერა და საარჩევნო კლიპში გამოჩნდა.
გათავისუფლების მიზეზი ის გახდა, რომ მაუწყებლის ნებისმიერ თანამშრომელს პოლიტიკური პარტიის მიერ ორგანიზებულ ღონისძიებებში მონაწილეობა ეკრძალება.
"ბავშვის დედა კართან მუხლებზე მდგომი დამხვდა, სიტყვებს თავს ვერ უყრიდა" - სცენიდან ომში და ომიდან სამაშველო სამსახურში წასული ბიჭის ამბავი
"ბავშვის ოპერაცია 300 000 ევრო ჯდება და სანამ თანხას არ გადავურიცხავთ, არაფერს უკეთებენ" - პატარა ანიტას დახმარება სჭირდება
