რატომ გადაიდო ქუთაისის აეროპორტიდან ფრენები - აეროპორტის განმარტება

ძლიერი ქარის გამო ქუთაისის აეროპორტიდან ფრენები დროებით გადაიდო. ქუთაისის საერთაშორისო აეროპორტის ინფორმაციით, საათზე მეტია შეყოვნებულია მილანისა და ბარსელონას მიმართულება.

"არ ვიცით, ზუსტად, განხორციელდება თუ არა დღეს ეს რეისები. ასევე, ღამით დაგეგმილია კიდევ ერთი რეისი - რიგის მიმართულებით და ესეც არ ვიცით, გადაიდება თუ არა. აეროპორტში უკვე ჩამოფრინდა თვითმფრინავები დორტმუნდიდან და ბერლინიდან. მგზავრები უსაფრთხოდ არიან, პრობლემა მხოლოდ ისაა, რომ ქარის გამო ვერ იხსნება თვითმფრინავის სატვირთო განყოფილება, სადაც ბარგია", - განუცხადეს "ბიზნესპრესნიუსს" ქუთაისის აეროპორტში. ქუთაისში, დღეს, 22:00 საათიდან 23:00 საათის ჩათვლით ძლიერი ქარია მოსალოდნელი.