ცნობილი სახეები და სასულიერო პირები ნიკა რურუას დაკრძალვაზე - ფოტორეპორტაჟი ვერის სასაფლაოდან

კულტურის ყოფილი მინისტრი, "ნაციონალური მოძრაობის" წევრი ნიკა რურუა ვერის სასაფლაოზე, წმინდა დიდმოწამე პანტელეიმონ მკურნალის სახელობის ტაძარშია დასვენებული. ვერის სასაფლაოზე რურუას მეგობრები, მისი თანაპარტიელები და ნათესავები იკრიბებიან.

ოჯახთან სამძიმრის გამოსახატად მივიდა საპატრიარქო ტახტის მოსაყდრე, მეუფე შიო.

სამძიმარზე მისული პოლიტიკოსები აცხადებენ, რომ ნიკა რურუა ქვეყნისთვის დიდი დანაკარგია. მათი თქმით, ნიკა რურუა დააკლდება როგორც ქვეყანას, ასევე პირადად მათ.

„ის მუდმივად სახელმწიფოებრივად საუბრობდა და ფიქრობდა. დიდი დანაკლისია ყველასთვის", - განაცხადა „ნაციონალური მოძრაობის“ ერთ-ერთმა ლიდერმა ნიკა მელიამ.

„ნიკა რურუა ჩემი კურსელი იყო. ჩვენ ერთად ვსწავლობდით სარეჟისორო ფაკულტეტზე. ძალიან დამწყდა გული", - განაცხადა სოსო ჯაჭვლიანმა.

ნიკა რურუას ტაძრიდან 15:00 საათზე გამოასვენებენ და ვერის სასაფლაოზე დაკრძალავენ.

„ნაციონალური მოძრაობის“ ერთ-ერთი ლიდერი, ყოფილი დეპუტატი და კულტურის ყოფილი მინისტრი ნიკა რურუა 50 წლის ასაკში საკუთარ სახლში, 4 დეკემბერს გარდაიცვალა.

ფოტო: გიორგი ჟარმელაშვილი