გრიპით გარდაცვლილების რაოდენობა საქართველოში 8-მდე გაიზარდა

საქართველოში გრიპის ვირუსით, კერძოდ, H1N1-ით 8 ადამიანი გარდაიცვალა. ამის შესახებ “ინტერპრესნიუსს” დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორმა ამირან გამყრელიძემ განუცხადა. მისი თქმით, ყველა ამ შემთხვევაში, H1N1-ის ვირუსი სხვა ძირითად დაავადებასთან ერთად მიმდინარეობდა, სამედიცინო დაწესებულებაში მიმართვა კი დაგვიანებული იყო.

„ყველა შემთხვევაში გვაქვს დაგვიანებული მიმართვა სამედიცინო დაწესებულებისადმი. რვიდან ერთი იყო ორსული ქალი, ერთი ახალგაზრდა მამაკაცი, რომელსაც მძიმე პნევმონია ჰქონდა და სამედიცინო დაწესებულებას გვიან მიმართა, ხოლო დანარჩენ ექვს H1N1-ის ვირუსი ქრონიკულ დაავადებასთან ერთად ჰქონდა (სიმსივნე, გულის მწვავე ინფარქტი, თავის ტვინში სისხლის მიმოქცევის შემდგომი მდგომარეობა და ა.შ)”, - აღნიშნა მან.

ამირან გამყრელიძის განცხადებით, უახლოეს ორი კვირის განმავლობაში გრიპის ვირუსის გავრცელების მკვეთრად ზრდა მოსალოდნელი არ არის, რადგან ბაღებსა და სკოლებში სასწავლო პროცესი საახალწლო არდადეგების გამო ჯერ კიდევ არ განახლებულა.