კარანტინი მცხეთისა და რუსთავის საავადმყოფოებში - რამდენიმე პაციენტი მართვით სუნთქვაზე იმყოფება

რუსთავის ცენტრალურ საავადმყოფოში კვლავ კარანტინია გამოცხადებული, ბავშვთა საავადმყოფოში კი, მნახველთა შესვლა შეზღუდულია. როგორც "ინტერპრესნიუსს" რუსთავის საზოგადოებრივი ჯანმრთელობისა და უსაფრთხო გარემოს ცენტრის ხელმძღვანელმა დავით ბეგაშვილმა განაცხადა, ბოლო ერთი თვის მონაცემებით, რუსთავში გრიპით დაავადების 200 შემთხვევა დაფიქსირდა, საბედნიეროდ, აქედან არც ერთი არ არის ე.წ. ღორის გრიპი.

„ბოლო მონაცემებით, გრიპის 200 შემთხვევაა დაფიქსირებული, რაც ეპიდემიურ ზღვარს არ სცილდება. რაც შეეხება კლინიკებში მიმართვიანობას, გაორმაგებულია გასულ წელთან შედარებით, 2017 წელთან შედარებით კი პირიქით, შემცირებულია. იმედი გვაქვს, რომ იანვრის მეორე ნახევარში მდგომარეობა დასტაბილურდება", -განაცხადა დავით ბეგაშვილმა.

ბოლო მონაცემებით, რუსთავის ცენტრალურ საავადმყოფოში გრიპის ვირუსისათვის დამახასიათებელი სიმპტომებით სტაციონარში 35 პაციენტია მოთავსებული.

კარანტინი გამოცხადდა, ასევე, მცხეთის სამედიცინო ცენტრშიც, სადაც რესპირატორული დაავადებით 50-მდე პაციენტი მკურნალობს, სამი კი, მართვით სუნთქვაზე იმყოფა.

„მცხეთა არ არის გამონაკლისი, ისევე როგორც მთელი საქართველო. ამ წუთისთვის, მწვავე რესპირატორული გამოვლინებებით კლინიკაში დაახლოებით 50-მდე პაციენტი გადის მკურნალობის კურსს. კლინიკა იმყოფება კარანტინის მდგომარეობაში. ვითარება საკმაოდ რთულია მომართვიანობიდან გამომდინარე. H1N1 კლინიკაში დადასტურებული არ არის, რადგან არ ჩატარებულა ანალიზი. გარდაცვალების ფაქტი არ დაფიქსირებულა. მართვით სუნთქვაზე იმყოფება 3 ადამიანი", - განაცხადა „მცხეთის სამედიცინო ცენტრის“ კლინიკურმა დირექტორმა დავით ლოლაძემ.

H1N1 ვირუსით ამ დროისთვის საქართველოში 8 ადამიანია გარდაცვლილი.