ბრიტანელი, რომლის შესახებ ინფორმაციაზე 25 000 ფუნტია დაწესებული, შესაძლოა, საქართველოში იმალებოდეს - Daily Mail

ბრიტანელი მამაკაცი, რომელსაც ახალგაზრდა ქალის მკვლელობა ედება ბრალად და მას პრემიერ-მინისტრი ტერეზა მეი დანებებისკენ მოუწოდებს, შესაძლოა, საქართველოში იმალებოდეს, ამის შესახებ Daily Mail წერს.

გამოცემის ინფორმაციით, 31 ჯეკ შეფერდი საკუთარ კატერს ნასვამ მდგომარეობაში მართავდა, სიჩქარის გადაჭარბების გამო კატერი გადაბრუნდა, რასაც 24 წლის შარლოტა ბრაუნის სიცოცხლე ემსხვერპლა. მამაკაცმა გოგონას დახმარება არც სცადა, სამაშველო სამსახური კი შეცდომაში შეიყვანა. შემთხვევა 2015 წლის დეკემბერში მოხდა, შეფერდი კი 2018 წლის ივლისში სასამართლო პროცესის დაწყებამდე გაუჩინარდა და მისი პოვნა პოლიციელებმა ამ დრომდე ვერ შეძლეს.

ლონდონელი დეტექტივები, რომლებიც შეფერდს ეძებენ, ვარაუდობენ, რომ ის ესპანეთში, ან - საქართველოში შეიძლება იმალებოდეს.

Daily Mail პირს, რომელიც ჯეკ შეფერდის შესახებ ინფორმაციას მიაწვდის, 25 ათას ბრიტანულ ფუნტს გადასცემს. იმ შემთხვევაში, თუ ვინმე ბრალდებულის შესახებ ცნობებს ფლობს, გამოცემას უნდა დაუკავშირდეს ნომერზე 0203 615 1154, ან ელექტრონულ ფოსტაზე reward@dailymail.co.uk

Ambebi.ge აღნიშნულ საკითხზე შინაგან საქმეთა სამინისტროს პრესსამსახურს დაუკავშირდა:

"ბრიტანელ სამართალდამცველებს საქართველოს შინაგან საქმეთა სამინისტროსთვის აღნიშნულ პირთან დაკავშირებით არ მოუმართავთ და ის არც ინტერპოლით ძებნილთა სიაში ფიქსირდება. რაც შეეხება საზღვრის კვეთას, პირის მიერ საზღვრის კვეთის შესახებ ინფორმაცია განეკუთვნება პერსონალურ ინფორმაციას" - განაცხადეს პრესსამსახურში.