“აიპლიუსი” Apple-ის ოფიციალური პარტნიორი გახდა

Apple საქართველოში მყოფ მომხმარებლებს Apple-ის ტექნიკის შეძენას “აიპლიუსში“ ურჩევს. Apple-ის ვებ-გვერდზე გამოქვეყნებული ინფორმაციის თანახმად, “აიპლიუსი” (iPhone+) Apple-ის ოფიციალური პარტნიორი გახდა, - ამის შესახებ „ინტერპრესნიუსს“ „აიპლიუსიდან“ აცნობეს.

მათივე ინფორმაციით, ხელშეკრულება Apple-თან ოფიციალურ პარტნიორობაზე, გასული წლის დეკემბერში, მას შემდეგ გაფორმდა, რაც Apple-მა “აიპლიუსის” სამ ძირითად მოთხოვნის შესრულებაზე თანხმობა განუცხადა.

“აიპლიუსის” გენერალური მენეჯერის, კახა სეფაშვილის თქმით, Apple-ი საქართველოს რუსეთის სივრცედ განიხილავდა. მისვე თქმით, “შეთანხმების შემდეგ კი, თავის პოლიტიკას გადახედა” .

„Apple-თან მოლაპარაკებები სამი წლის მანძილზე, სამ მნიშვნელოვან თემაზე მიმდინარეობდა. ოფიციალურ პარტნიორობას მას შემდეგ მოეწერა ხელი, რაც Apple-მა “აიპლიუსის” სამი მოთხოვნიდან ორი დააკმაყოფილა, ხოლო მესამე მოთხოვნაზე მივიღეთ შესრულების პირობა.

მაღაზიებში ამ დრომდე MacBook-ები რუსულ-ინგლისური კლავიატურით იყიდება. ჩვენს მიერ ჩატარებული გამოკითხვის თანახმად, მომხმარებელების უმეტესობას არ მოსწონს რუსულ-ინგლისური კლავიატურის მქონე MacBook-ები. მომხმარებლების მოთხოვნის გათვალისწინებით, Apple-თან შევთანხმდით, რომ Apple-ი “აიპლიუსს” მხოლოდ ლათინური კლავიატურის მქონე MacBook-ებს მოგვაწვდის. ჩვენ პრინციპულად უარს ვამბობთ რუსული კლავიატურის მქონე MacBook-ების გაყიდვაზე.

Apple “აიპლიუსთან” შეთანხმებამდე საქართველოს განიხილავდა, როგორც რუსეთზე დამოკიდებულ პოსტსაბჭოთა სივრცედ. პროდუქციის მოწოდება ხდებოდა რუსეთის გავლით, ნაცვლად პროდუქციის უშუალოდ ამერიკიდან მიწოდებისა. Apple-მა დააკმაყოფილა ჩვენი მოთხოვნა პროდუქციის რუსეთის ნაცვლად ამერიკიდან მოწოდებაზე“, -ნათქვამია „აიპლიუსის“ მიერ გავრცელებულ ინფორმაციაში.

მათივე განმარტებით, Apple-მა პირობა მოგვცა, რომ საქართველოში სწრაფი საგარანტიო სერვისი ამოქმდდება, ეს ნიშნავს, რომ წლის ბოლომდე Apple საქართველოში ახალ სერვის ცენტრს გახსნის და მსგავსად გერმანიისა და საფრანგეთისა, საგარანტიო მომსახურების დრო 2 საათამდე შემცირდება”, - განაცხადა კახა სეფაშვილმა.

„აიპლიუსი“ ბაზარზე 2009 წლიდან არის წარმოდგენილი. ამ პერიოდის განმავლობაში, „აიპლიუსი“ მილიონზე მეტ ქართველ და უცხოელს მომხმარებელს მოემსახურა.

NS