გრანდიოზული კონცერტი ქართველი ვარსკვლავების მონაწილეობით და პროექტი, რომელიც ოცამდე უსახლკარო ოჯახს გააბედნიერებს

საქველმოქმედო ფონდი "კეთილსოფელი" ახორციელებს პროექტს, რომლის მიზანი ბათუმში, სხალთის ქუჩაზე მდებარე ხუთსართულიანი კორპუსის - "სიკეთის სახლის" აშენებაა. "სიკეთის სახლში" ოცამდე უსახლკარო ოჯახი დასახლდება. სახლის ერთ-ერთი ბინადარი შეზღუდული შესაძლებლობის მქონე პირიც იქნება, რომელიც ამჟამად ასევე უსახლკაროა. აქვე იქნება, ამბულატორია, სახელოსნოები - ბენეფიციარების დასასაქმებლად და სარეაბილიტაციო ცენტრები.

• "გზა უკეთესი ვერ ვნახე"

საქველმოქმედო ფონდის დამფუძნებელი, პოეტი მიხეილ ტყებუჩავაა ("მებაღე").

ფონდის პროექტი მოიცავს შერჩეული ბენეფიციარების არამარტო საცხოვრებლით უზრუნველყოფას, არამედ მათთვის სარეაბილიტაციო სხვადასხვა პროექტების განხორციელებას და საზოგადოებაში ინტეგრირებას. აქვე იქნება დავით აღმაშენებლის სახელობის აკადემიის მცირე ფილიალი ქალბატონ ნანა ჯიქიას ხელმძღვანელობით, სადაც ახალგაზრდები, შშმ პირებთან ერთად, სხვადასხვა სახის უფასო ინტეგრირებულ განათლებას მიიღებენ. ფონდის იდეაა ასევე აშენდეს პატარ-პატარა "კეთილსოფლები" საქართველოს ყველა კუთხეში.

პროექტი სრულიად საქართველოს კათოლიკოს-პატრიარქის, უწმინდესისა და უნეტარესის ილია II-ის ლოცვა-კურთხევით ხორციელდება.

"სიკეთის სახლის" ასაშენებლად ბათუმსა და თბილისში, არაერთი საქველმოქმედო ღონისძიება ჩატარდა, მათ შორის სამი კონცერტი ფილარმონიის დიდ საკონცერტო დარბაზში, რომელშიც ყველასთვის საყვარელი ქართველი ვარსკვლავები მონაწილეობდნენ. კონცერტების შედეგად შემოსული თანხით "სიკეთის სახლის" სამი სართული აშენდა. თითო სართული 510 კვადრატული მეტრია.

მშენებლობა რომ არ შეჩერდეს და ეს კეთილშობილური საქმე ბოლომდე მივიდეს, 28 თებერვალს, 20 საათზე თბილისში, ფილარმონიის დიდ საკონცერტო დარბაზში გრანდიოზული კონცერტის ჩატარება დაიგეგმა, რომელშიც მონაწილეობას მიიღებენ ყველასთვის საყვარელი ქართველი ვარსკვლავები. შემოსული თანხა მთლიანად სიკეთის სახლის მშენებლობას მოხმარდება.