"მიმტკიცებდა, რომ წარმატებას ვერასოდეს მივაღწევდი..." - რა პირობა შეუსრულა ლედი გაგამ ყოფილ შეყვარებულს, რომელსაც მისი არ სჯეროდა

ბოლო პერიოდში ლედი გაგას შესახებ მედია ძალიან ბევრს წერს, მისი პოპულარობა ფილმმა „ვარსკვლავი დაიბადა“ (Star Is Born) კიდევ უფრო გაზარდა. ყველაფერი კი „ოსკარით“ დაგვირგვინდა - ფილმისთვის შექმნილი სიმღერისთვის Shallow მუსიკოსმა კინოაკადემიის უმაღლესი ჯილდო მიიღო.

თუმცა, დიდებამდე მომღერალმა ბევრი სირთულე გადაიტანა. როგორც თავად ამბობს, ვიდრე პოპულარული გახდებოდა, მისთვის ყველაზე ახლობელი ადამიანები და მათ შორის - შეყვარებული, დამწყებ მუსიკოსს უმტკიცებდნენ, რომ წარმატების მიღწევას ვერ შეძლებდა.

2010 წელს „კოსმოპოლიტენისთვის“ მიცემულ ინტერვიუში ლედი გაგა ამბობდა:

"მყავდა შეყვარებული, რომელიც მიმტკიცებდა, რომ წარმატებას ვერასოდეს მივაღწევდი, არასოდეს ვიქნებოდი ნომინირებული „გრემიზე“, არასოდეს გახდებოდა ჩემი სიმღერა ჰიტი. მე კი დავპირდი - „ოდესმე, როცა ერთად აღარ ვიქნებით, შენ კაფეში ყავის დალევასაც კი ვერ შეძლებ ისე, რომ მე არ დამინახო, ან ჩემი ხმა ვერ გაიგო“.

როგორც ჩანს, მუსიკოსის დაუღალავმა შრომამ შედეგი გამოიღო და ყოფილი შეყვარებულისთვის მიცემული დაპირებაც აასრულა. 2016 წლის იანვრის მონაცემებით, მას 27 მლნ ალბომი და 146 მლნ სინგლი აქვს გაყიდული, რის საფუძველზეც გაგა მსოფლიოს ისტორიაში ერთ-ერთი ყველაზე გაყიდვადი მუსიკოსია.

გარდა ყველასთვის საოცნებო "ოსკარისა", მას დამყარებული აქვს გინესის რამდენიმე რეკორდი, მიიღო 9 „გრემი“, BAFTA-ს ჯილდო, ორი „ოქროს გლობუსი“... ლედი გაგა დასახელდა „ბილბორდის“ წლის ადამიანად და არაერთხელ მოხვდა საკუთარი შემოსავლით „ფორბსის“ რეიტინგებში. „თაიმსმა“ ის ყველაზე გავლენიან ადამიანებს შორის დაასახელა.

მუსიკოსი ცნობილია ქველმოქმედებითა და სოციალური აქტივიზმით, ლედი გაგას ორგანიზაცია Born This Way Foundation ახალგაზრდების გაძლიერებასა და ბულინგის პრევენციას ემსახურება.