რას პასუხობს მამუკა ხაზარაძე კითხვას, მიიღო თუ არა მუქარის წერილი ბადრი ჯაფარიძის შუამავლობით

„თიბისი ბანკის“ დამფუძნებელი მამუკა ხაზარაძე პირდაპირ და მკაფიო პასუხს არ სცემს შეკითხვას, მუქარის შემცველი წერილი მიიღო თუ არა მისივე ბიზნესპარტნიორის, ბადრი ჯაფარიძის შუამავლობით.

ხაზარაძეს აღნიშნულთან დაკავშირებით შეკითხვა ჟურნალისტებმა დღეს დაუსვეს.

"ბადრი ჯაფარიძე და მე, იცით რომ ვართ არა მარტო პარტნიორები, არამედ ერთი ოჯახის წევრები და შესაბამისად შუამავლობაზე არ შეიძლება ლაპარაკი იყოს, რამეთუ ჩვენ ვართ ერთი მხარე" - განაცხადა ხაზარაძემ.

შეგახსენებთ, რომ ხაზარაძის განცხადებით, შინაგან საქმეთა მინისტრ გიორგი გახარიასგან მუქარის შემცველი წერილი მიიღო. მოგვიანებით, ითქვა, რომ ხაზარაძეს წერილი შუამავალმა მიუტანა. გავრცელებული ინფორმაციით, შუამავალი „თიბისი ბანკის“ კიდევ ერთი დამფუძნებელი ბადრი ჯაფარიძეა.

წაიკითხეთ: მუქარის წერილში, რომელიც მამუკა ხაზარაძის თქმით, გიორგი გახარიამ გაუგზავნა, სამი ტელევიზიაა მოხსენიებული

გარდა ამისა, მამუკა ხაზარაძემ სამომავლო გეგმების შესახებაც ისაუბრა და აღნიშნა, რომ მათი "გეგმები გაცილებით შორს მიდის, ცდება მარტო პორტის მშენებლობას და მომავალი პარტნიორობა hyundai samho heavy industries-სთან იქნება სწორედ გემთმშენებლობისკენ მიმართული და იქითკენ მიმართული, რომ საქართველოს ჰყავდეს თავისი ფლოტი და თავისი გემები".

"დღეს მნიშვნელოვანი დღეა ანაკლიის განვითარების კონსორციუმისთვის, რამეთუ მსოფლიოს გიგანტ კომპანიასთან გავაფორმეთ პარტნიორობის ხელშეკრულება. ეს არის სამხრეთკორეული hyundai samho heavy industries, რომელიც აწარმოებს პრაქტიკულად ყველაფერს, მათ შორის ყველა დანადგარს, რომელიც ჩვენ გვესაჭიროება. ასევე მსოფლიო სამეულში შედის გემთმშენებლობაში", - განაცხადა ხაზარაძემ.

მამუკა ხაზარაძე დღეს გამართულ ხელმოწერის ცერემონიალს ესწრებოდა, რომელზეც "ანაკლიის განვითარების კონსორციუმმა" კომპანია hyundai samho heavy industries-სთან ურთიერთთანამშრომლობის მემორანდუმი გააფორმა და სწორედ ეს კომპანიაა გამარჯვებული საერთაშორისო ტენდერში, რომლითაც კონსორციუმმა ამწეების პროვაიდერი შეარჩია.