ბავშვთა პრობლემური საკითხების გადაწყვეტაში მღვდლები ჩაერთვებიან, სქესობრივი აღზრდის გაკვეთილებს კი მშობლის თანხმობით ჩაატარებენ?

ბავშვთა პრობლემური საკითხების გადაწყვეტაში, შესაძლოა, სამღვდელო პირები ან სხვადასხვა კონფესიის წარმომადგენლები ჩაერთონ. როგორც ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, სოფიო კილაძემ კომიტეტის სხდომაზე „ბავშვის უფლებათა კოდექსზე“ საუბრისას განაცხადა, თუ ოჯახი მოითხოვს და თვლის, რომ ეკლესიის წარმომადგენლის ჩართვა არის საჭირო მათ მიერ პრობლემურად მიჩნეულ საკითხებში, ამის შესაძლებლობას მათ ახალი კოდექსი მისცემს, რომლის მიხედვითაც, ბავშვთა კოდექსის მეცხრე ნაწილს შესაბამისი დებულება ემატება.

„კოდექსისი მეცხრე ნაწილში, გავაჩინეთ ასეთი დებულება, თუ ოჯახი ითხოვს საქართველოს მართლმადიდებულური ეკლესიის წარმომადგენლის, ან სხვა კონფესიის წარმომადგენლის ჩართვას ისეთ შემთხვევებში, რომელსაც ისინი პრობლემურად მიიჩნევენ, არის შესაძლებლობა, რომ ჩაერთონ ის პირები, ვისაც ოჯახი მოითხოვს და კონსულტაციების დონეზე იყოს შესაბამისი მოლაპარაკებები წარმოებული. ვფიქრობთ, რომ ვისაც აქვს ამის სურვილი უნდა მივცეთ მათ ამის საშუალება, მითუმეტეს ისეთ ქვეყანაში, როგორიც საქართველოა, სადაც ძალიან დიდი არის მართლმადიდებლური ეკლესიის როლი განსაკუთრებით და რა თქმა უნდა, სხვა კონფესიებისაც იმ გადმოსახედიდან, რომელსაც თვითონ წარმოადგენენ. მგონია, რომ ძალიან კარგი ცვლილება არის ეს“, - განაცხადა სოფო კილაძემ.

გარდა ამისა, სქესობრივი აღზრდის გაკვეთილები დასაშვები იქნება მხოლოდ და მხოლოდ მშობლის თანხმობით. კილაძის თქმით, ამ კოდექსის ანტიეროვნულობასთან დაკავშირებით კითხვები არ უნდა დარჩეს.

„ჩვენ პირველად შემოგვაქვს საკანონმდებლო დონეზე, რომ ჩვენი შვილები მაღალი ზნეობრივი ღირებულებებით უნდა აღვზარდოთ. ასევე, სქესობრივი აღზრდის გაკვეთილები დასაშვები იქნება მხოლოდ და მხოლოდ მშობლის თანხმობით. ასევე, თუ ოჯახი მოითხოვს კონკრეტულ შემთხვევაში, მართლმადიდებლურ ეკლესიას და სხვა კონფესიებს, ვისაც მოითხოვს კონკრეტული ოჯახი, მათ უფლება ექნებათ ჩაერთონ და კონსულტაციები გაიარონ ამ კონკრეტულ საკითხთან მიმართებით. უბრალოდ მინდა ვკითხო საზოგადოებას - ეს ყველაფერი შეიძლება იყოს ანტიეროვნული? - რა თქმა უნდა, არ შეიძლება. აქ არის კონკრეტული გარანტიები ჩადებული იმისა, რაც სჭირდება ჩვენს ქვეყანას, რაც სჭირდება ოჯახების გაძლიერებას, ჩვენი ბავშვების კეთილდღეობას.

მზად ვარ, ნებისმიერ ადამიანთან გავიარო კონსულტაციები, აქაც შეუძლიათ მობრძანდნენ კომიტეტის სხდომაზე, რომ არ დარჩეს კითხვები ამ კოდექსის ანტიეროვნულობასთან დაკავშირებით“, - განაცხადა კილაძემ.

კოდექსის მეცხრე ნაწილი ბავშვის ზეგავლენისგან დაცვას ეხება.