აშშ ცენტრალურ აზიაში დასამკვიდრებლად უზბეკეთის საზღვართან სამხედრო ბაზას აშენებს

აშშ უზბეკეთის საზღვართან ახალი სამხედრო ბაზის მშენებლობას აპირებს. შედეგად უზბეკეთი ავღანეთისკენ მიმავალ გზაზე მნიშვნელოვანი სატრანზიტო პუნქტი გახდება, - წერს "Независимая газета".

ამერიკის სპეცოპერაციათა კომპლექსი ავღანეთის ჩრდილოეთით, უზბეკეთ-ავღანეთის საზღვრამდე 56 კმ-ის დაშორებით შეიქმნება. ამ პროექტით იგეგმება ოპერატიული და ტაქტიკური ოპერაციების ცენტრების, საცხოვრებელი ნაგებობების, საწყობების, სავარჯიშო კომპლექსის, მატერიალურ-ტექნიკური მომარაგების ცენტრისა და ა.შ. აგება.

ბაზა ავღანეთის ოპერაციის მხარდაჭერაში განსაკუთრებულ როლს შეასრულებს, - განაცხადა გენერალმა დევიდ პეტრეუსმა, რომელიც ცოტა ხნის წინ ავღანეთში აშშ-ის საერთაშორისო ძალების მეთაურად დაინიშნა.  

გარდა ამისა, ცენტრალური აზიის ტერიტორიაზე პატარა პროექტებიც განხორციელდება. უზბეკეთში, თურქმენეთსა და ყირგიზეთში სასაზღვრო გამშვები პუნქტების მშენებლობა დაიწყება, - წერს Eurasianet.org.

რუსი ექსპერტი ალექსეი მალაშენკო მიიჩნევს, რომ ამერიკელთა აქტიურობა ავღანეთში გაჭიანურებული სამხედრო მოქმედებებით აიხსნება. მისი თქმით, აშშ-ს იქ კიდევ ბევრი ბაზის აგება დასჭირდება. ეს აქტუალური განსაკუთრებით ყირგიზეთის მოვლენების შემდეგ გახდა, რამაც აჩვენა, რომ ამერიკული ბაზის ”მანასის” პოზიციები არასაკმარისად მყარია.

გასულ კვირას ვაშინგტონში გაიმართა აშშ-უზბეკეთის ბიზნეს-ფორუმი, სადაც გამოითქვა სურვილი ”ნავოის” თავისუფალ ინდუსტრიულ ზონაში ინვესტიციების თაობაზე. ”ნავოი” ავღანეთში ტვირთების გადასაზიდად მთავარი სატრანზიტო პუნქტია.

გამორიცხული არაა, პროექტი სულ მალე ტრანსკონტინენტალურ სატრანსპორტო-ექპედიციურ ავიაკვანძად იქცეს, რომელიც შორეულ აღმოსავლეთს, სამხრეთ-აღმოსავლეთ აზიას, სამხრეთ აზიასა და ევროპას ერთმანეთთან დააკავშირებს.

აშშ-ის საგარეო პოლიტიკაში უზბეკეთის განსაკუთრებულ როლზე ამ ქვეყანაში ახალი ელჩის დანიშვნაც მიანიშნებს. პრეზიდენტი ბარაკ ობამა ამ თანამდებობაზე ჯორჯ კროლის კანდიდატურის წარდგენას აპირებს, რომელიც ამჟამად სამხრეთ და ცენტრალური აზიის საკითხში აშშ-ის სახელმწიფო მდივნის მოადგილის პოსტს იკავებს, - იუწყება სააგენტო Regnum.

მომზადებულია newsru.com-ის მიხედვით.