სოფელ ნაბაკევში 9 აპრილის მემორიალი რუსმა ოკუპანტებმა გადააკეთეს

30 წლის წინ, 1989 წლის მიწურულს, ოკუპირებული აფხაზეთის სოფელ ნაბაკევში აღმართული 9 აპრილის მემორიალი, რუსმა ოკუპანტებმა გადააკეთეს და სახე შეუცვალეს. მემორიალს, რომელიც წლების წინ ცხრა აპრილს დაღუპულთა ხსოვნას მიეძღვნა, დღეს აწერია - "აფხაზეთის თავისუფლებისათვის დაცემული მეომრების უკვდავსაყოფად".

მემორიალი 30 წლის წინ ეროვნული მოძრაობის წევრმა, ხურჩის მცხოვრებმა ჯამბულ ეხვაიამ და ადგილობრივმა მოსახლეობამ მოაწყვეს. ეხვაია AMBEBI.GE-ს უყვება, რომ ეს ნაბაკევში მაშინ ყველაზე წმინდა ადგილად ითვლებოდა. იხსენებს, რომ მემორიალის გახსნაც საკმაოდ მასშტაბური იყო:

"ენა მამული სარწმუნება - ასეთ სიმბოლოდ იყო აღმართული 9 აპრილის დღის აღსანიშნავად. პირველ სვეტზე დედა ენა, ცენტრში საქართველოს კონტურული რუკა და მესამე ფლიგელზე წმინდა გიორგის ხატი იყო გამოსახული. მემორიალს ჰქონდა გუმბათის ფორმა და მასზე ჯვარი იყო აღმართული, გვერდით კი ზარი ჩამოკიდებული.

წლების განმავლობაში ნაბაკევში ახლადდაქორწინებულები მიდიოდნენ მემორიალთან და 21 სანთელს ანთებდნენ, იმდენი შანდალი იყო, რამდენიც იმ ტრაგიკულ ღამეს დაიღუპა..." - იხსენებს ეხვაია AMBEBI.GE-სთან საუბარში.

მისივე თქმით, მემორიალის ნახაზი 1989 წელს მისი ხელმძღვანელობით გაკეთდა და აღმართვა მაშინდელმა კოლმეურნეობამ დააფინანსა:

"სიმბოლურად იყო ნიჩაბი და მის წინ აღმართული მტევნები, რომელიც უპირისპირდებოდა ამ ძალადობას. დღევანდელი კურსით რომ დავთვალოთ, 22 000 ლარი დაიხარჯა, რადგან მარმარილოთი იყო თავიდან ბოლომდე მოპირკეთებული. ღობე და ეზოც მოვაწყვეთ. პომპეზური გახსნა გვქონდა - მღვდელიც ჩამოვიყვანეთ ილორიდან, რომელმაც აკურთხა მემორიალი“, - გვითხრა ჯამბულ ეხვაიამ.

როგორც ეხვაია ამბობს, მას ცოტა ხნის წინ გალის მუნიციპალიტეტიდან შეატყობინეს, რომ ნაბაკევში აღმართული 9 აპრილის მემორიალი რუსმა ოკუპანტებმა გადააკეთეს. მამაკაცი წუხს, რომ ოკუპანტები კვლავ ცდილობენ შეცვალონ ისტორია, თითქოს მემორიალი "აფხაზეთის თავისუფლებისათვის დაცემული მეომრების უკვდავსაყოფად" არის აღმართული:

"რამდენი ენერგია, შრომა და მხარდაჭერა ჩაიდო იმაში, რომ 1989 წელს, 9 აპრილის ეს მემორიალი აღმართულიყო ნაბაკევის ცენტრში. მემორიალის კვარცხლბეკზე შემართული მარჯვენა, უარს ამბობდა რუსული ხელნიჩაბის ძალმომრეობაზე. წლები გავიდა და დღეს ეს მემორიალი ოკუპანტებმა გადააკეთეს. ცვლიან ისტორიას, ცდილობენ ყველგან და ყველაფერში წაშალონ ქართული კვალი“ - ამბობს ეხვაია.