გარესამყაროს მოწყვეტილი სოფელი და დაზიანებული ინფრასტრუქტურა - ძლიერმა წვიმამ ხარაგაული დააზარალა

უხვი ნალექის შედეგად ხარაგაულის მუნიციპალიტეტის სოფლებში დაზიანდა ინფრასტრუქტურა, სოფელი ლეღვანი კი გარესამყაროს არის მოწყვეტილი.

ხარაგაულის მუნიციპალიტეტის საკრებულოს საფინანსო-საბიუჯეტო კომისიის თავმჯდომარის ვარლამ ჭიპაშვილის ინფორმაციით, ძლიერმა წვიმამ ხარაგაულის მუნიციპალიტეტში სერიოზული პრობლემები შექმნა: სოფლებში დაზიანებულია ინფრასტრუქტურა, განსაკუთრებით, დაზიანდა ხიდ-ბოგირები, ადგილობრივი მოსახლეობის საცხოვრებელი ფართები და დამხმარე ნაგებობები.

ამ დროისთვის სპეცტექნიკით გზების გაწმენდითი სამუშაოები მიმდინარეობს სოფელ ლეღვანში, მარელისში, მოლითი-ჩუმათელეთის დამაკავშირებელ გზაზე, სადაც ჩამოწოლილია მეწყერი. ხარაგაულის მერიაში საგანგებო შტაბი შეიქმნა, მიმდინარეობს ზარალის დათვლა. მერიის ინფორმაციით, მთელი ღამის განმავლობაში სტიქიის ზონაში იმყოფებოდნენ სამაშველო ჯგუფები, იმერეთის სამხარეოსა და ადგილობრივი თვითმმართველობის წარმომადგენლები.

VIDEO: კადრები ხარაგაულიდან, სადაც მდინარეები ადიდდა, მეწერი ჩამოწვა და სოფელი გარე სამყაროს მოწყდა - რა პრობლემები შეუქმნა ძლიერმა წვიმამ მოსახლეობას?