რომელ რიცხვებში ჩატარდება ეროვნული გამოცდები - განრიგი და დეტალები, რაც აბიტურიენტებმა უნდა გაითვალისწინონ

2019 წლის ერთიანი ეროვნული და საერთო სამაგისტრო გამოცდების ჩატარების განრიგი ცნობილია.

ერთიანი ეროვნული გამოცდები ქართული ენისა და ლიტერატურის გამოცდით პირველ ივლისს დაიწყება, 23 ივლისს კი ფიზიკის გამოცდით დასრულდება.

უფრო კონკრეტულად, გამოცდების ჩატარების განრიგი ასეთია:

• 1-2 ივლისი (პირველი და მეორე სესია) - ქართული ენა და ლიტერატურა
• 1 ივლისი (პირველი სესია) - აფხაზური ენა
• 1 ივლისი (პირველი სესია) - ოსური ენა
• 3-4 ივლისი (პირველი და მეორე სესია) - ზოგადი უნარები
• 5 ივლისი (პირველი სესია) - მათემატიკა
• 5 ივლისი (მეორე სესია) - სტუდენტთა საგრანტო კონკურსი
• 8-9 ივლისი (პირველი და მეორე სესია) - ინგლისური ენა
• 8 ივლისი (პირველი სესია) - რუსული ენა
• 8 ივლისი (მეორე სესია) - გერმანული ენა
• 8 ივლისი (მეორე სესია) - ფრანგული ენა
• 10 ივლისი (მეორე სესია) - ქიმია
• 11 ივლისი (მეორე სესია) - ბიოლოგია
• 12 ივლისი (მეორე სესია) - სახვითი და გამოყენებითი ხელოვნება
• 15 ივლისი (პირველი და მეორე სესია) - ისტორია
• 16 ივლისი (პირველი და მეორე სესია) - გეოგრაფია
• 19 ივლისი (მეორე სესია) - სამოქალაქო განათლება
• 22 ივლისი (პირველი სესია) - ლიტერატურა
• 23 ივლისი (პირველი სესია) - ფიზიკა

რაც შეეხება საერთო სამაგისტრო გამოცდებს, ისინი ჩატარდება:

• 17 ივლისი (მეორე სესია) - წაკითხულის გააზრება, ანალიტიკური წერა
• 18 ივლისი (მეორე სესია) - ლოგიკური მსჯელობა, რაოდენობრივი მსჯელობა
• 22 ივლისი (მეორე სესია) - წაკითხულის გააზრება, ანალიტიკური წერა
• 23 ივლისი (პირველი სესია) - წაკითხულის გააზრება, ანალიტიკური წერა
• 23 ივლისი (მეორე სესია) - ლოგიკური მსჯელობა, რაოდენობრივი მსჯელობა
• 24 ივლისი (პირველი სესია) - ლოგიკური მსჯელობა, რაოდენობრივი მსჯელობა

შეფასების და გამოცდების ეროვნული ცენტრის ხელმძღვანელმა სოფო გორგოძემ ბრიფინგზე განაცხადა, რომ წელს მთელი საქართველოს მასშტაბით 11 ქალაქში 23 საგამოცდო ცენტრი გაიხსნება. ყველა ცენტრი აღიჭურვება გაგრილების სისტემითა და საჭირო ინფრასტრუქტურით.

ცენტრის ინფორმაციით, საგამოცდო ცენტრების მიმდებარე ტერიტორიაზე მობილიზებული იქნება სასწრაფო დახმარების მანქანები, სამაშველო სამსახური და საპატრულო პოლიცია.

ამასთან, აბიტურიენტებისთვის საგამოცდო ცენტრებამდე მისაყვანად სპეციალური ავტობუსებიც იმუშავებს.

ცნობისთვის, 2019 წელს, ერთიანი ეროვნული გამოცდებისათვის 41000-მდე აბიტურიენტი დარეგისტრირდა; საერთო სამაგისტრო გამოცდისათვის რეგისტრაცია 12000-მდე კანდიდატმა გაიარა; სტუდენტთა საგრანტო კონკურსის ჩაბარების სურვილი 4600-მდე სტუდენტმა გამოთქვა;

მასწავლებლის კომპეტენციას 31 000-ზე მეტი აპლიკანტი დაადასტურებს. რაც შეეხება მასწავლებლის ჯილდოს აღების მსურველებს, როგორც გორგოძემ განაცხადა, 800-მა პენსიონერმა პედაგოგმა გამოცდაზე გასვლაზე რეგისტრაციის გავლის შემდეგ უარი განაცხადა და ჯილდოს მიღების სურვილი გამოთქვა, რის გამოც, ისინი რეგისტრაციიდან მოხსნეს.

10 ივლისიდან გამოცდებში პრაქტიკოსი მასწავლებლები და მასწავლებლობის მსურველები ჩაერთვებიან, ხოლო სტუდენტთა საგრანტო კონკურსი 5 ივლისს ჩატარდება. 17- 24 ივლისს გამოცდები მაგისტრობის მსურველთათვის გაიმართება.

ამასთან, ერთიან ეროვნულ გამოცდებზე არჩევითი საგნებიდან ისტორიას ყველაზე მეტი - 12 500-მდე აბიტურიენტი აბარებს. ამის შესახებ შეფასების და გამოცდების ეროვნული ცენტრის ხელმძღვანელმა სოფო გორგოძემ გამართულ ბრიგინგზე განაცხადა.

მისივე ინფორმაციით, საგამოცდო ბარათების ამობეჭდვას აპლიკანტები ელექტრონულად პირადი გვერდიდან (გვერდი, სადაც აბიტურიენტი ირჩევს გამოცდებს, პროგრამებს, ნახულობს შედეგებს) შეძლებენ.

გამოცდების ცენტრის ცნობით, ბარათზე დატანილი იქნება საგამოცდო ცენტრის მისამართი, გამოცდის დღე და რეგისტრაციის დაწყების დრო. საგამოცდო ბარათების ამობეჭდვის თარიღი შეფასებისა და გამოცდების ეროვნული ცენტრის ვებგვერდსა და ფეისბუკ გვერდზე გამოქვეყნდება. გორგოძემ აბიტურიენტებს მოუწოდა წინასწარ გადაამოწმონ თავიანთი საგამოცდო ცენტრები და გამოცდის თარიღი.

რაც შეეხება სიახლეს, გორგოძის ინფორმაციით, 2019 წლის მთავარი სიახლე გრანტის მიღების წესს შეეხო. კერძოდ, მისივე თქმით, ორი ან მეტი არჩევითი საგნის მონიშვნისა და ერთ-ერთ მათგანში ჩაჭრის ან რომელიმე მათგანზე არგამოცხადების შემთხვევაში, აბიტურიენტი შეინარჩუნებს სახელმწიფო სასწავლო გრანტის მიღების შესაძლებლობას. გამოცდები 2019 წელსაც ნაწილობრივ ელექტრონული ფორმატით ჩატარდება, რაც ტესტის (და არა პასუხების ფურცლის) ელექტრონულად მიწოდებას ითვალისწინებს.

გამოცდაში მონაწილე პირი დავალებას მისთვის განკუთვნილი კომპიუტერის ეკრანზე დაინახავს, პასუხებს კი პასუხების ფურცელზე მონიშნავს ან დაწერს. წელს გარკვეული ცვლილება შევიდა 4 საგნის (ქართული ენა და ლიტერატურა, ლიტერატურა, გეოგრაფია და უცხოური ენები) საგამოცდო ტესტში.