სელინ დიონის კაბამ მსოფლიო კვლავ აალაპარაკა - როგორ გამოიყურება 51 წლის მომღერალი

სელინ დიონი ბოლო დროს საზოგადოების წინაშე მუდამ თამამად ჩაცმული ჩნდება. გამონაკლისი არც მისი პარიზში გატარებული დღეებია - მომღერალი სასტუმროდან ყოველ დღე ექსტრავაგანტულად ჩაცმული გამოდის.

ამჯერად კი გამოცემა ELLE დიონის ახალ ფოტოებს ავრცელებს, სადაც კანადელი მომღერალი Ronald van der Kemp-ის კაბით ჩანს. კაბის კლასიკურმა ზედა ნაწილმა და ყვითელმა ქვედაბოლომ მედიისა და სოციალური ქსელების ყურადღება მიიქცია.

მომღერლის გარეგნობაზე ბოლო პერიოდში სხვადასხვა გამოცემა ბევრს წერს. მედიისთვის არც მისი სიგამხდრე დარჩა ყურადღების მიღმა.

თავად დიონი კი თავს არაჩვეულებრივად გრძნობს და სულაც არ სწუხს, თუ მისი წონა ვინმეს არ მოსწონს. მომღერალი 51 წლისაა და ცდილობს, იპოვოს სტილი, რომელშიც თავს ყველაზე კარგად იგრძნობს.

„ამას ჩემთვის ვაკეთებ, მინდა, თავი ვიგრძნო ძლიერად, ლამაზად და სექსუალურად,“ - ამბობს დიონი და მათ, ვისაც მისი გარეგნობა არ მოსწონს, მოუწოდებს, „თავი გაანებონ“.