თურქეთ-ირანის საზღვართან მომხდარმა მიწისძვრამ, სულ მცირე, 7 ადამიანი იმსხვერპლა - ფოტოები ტრაგედიის ადგილიდან

თურქეთისა და ირანის საზღვართან კვირას, გამთენიისას 5.7 მაგნიტუდის სიმძლავრის მიწისძვრა მოხდა, რომელიც დამანგრეველი აღმოჩნდა.

თურქეთის ხელისუფლების ოფიციალური ინფორმაციით, მიწისძვრას ირანის საზღვართან მდებარე, თურქეთის ვანის პროვინციაში სულ ცოტა 7 ადამიანი ემსხვერპლა, დაშავებულია 5 ადამიანი.

თურქეთის შინაგან საქმეთა მინისტრის ინფორმაციით, გარდაცვლილია 4 ზრდასრული და 3 ბავშვი. მისივე ცნობით, დაზიანებულია 1000-ზე მეტი შენობა.

მაშველები ნანგრევებიდან მოქალაქეების ამოყვანის ოპერაციას ახორციელებენ. თურქული მედიის ინფორმაციით, მიწისძვრამ თურქეთის 43 სოფელში გამოიწვია ზარალი.

ამასთან, თურქეთში მომხდარი მიწისძვრის შედეგად გარდაცვლილთა და დაშავებულთა შორის საქართველოს მოქალაქეები არ არიან. ამის შესახებ "ინტერპრესნიუსს“ საგარეო საქმეთა სამინისტროში განუცხადეს.

ფოტოები ტრაგედიის ადგილიდან, რომელსაც თურქული მედია ავრცელებს:

თურქეთში დამანგრეველი მიწისძვრა 24 იანვარსაც მოხდა. მაშინ ეპიცენტრი ელიაგიზის პროვინცია იყო და 40-ზე მეტი ადამიანი იმსხვერპლა. მიწისქვეშა ბიძგების სიმძლავრემ ელიაგიზში 6.8 მაგნიტუდა შეადგინა.