იტალიაში პატიმრები აბუნტდნენ - რა შედეგები მოჰყვა კორონავირუსის გამო დაწესებულ შეზღუდვებს ციხეებში

კორონავირუსის გავრცელების არეალის შეზღუდვის მიზნით, იტალიის მთავრობამ ქვეყნის მასშტაბით კარანტინი გამოაცხადა, დაწესდა გარკვეული შეზღუდვები ციხეებში. კონკრეტულად კი, შეიზღუდა მნახველთა ვიზიტები, რასაც პატიმრების მწვავე პროტესტი მოჰყვა.

ბუნტი იყო იტალიის 26 ციხეში. BBC-ის ცნობით არეულობა მოდენას სასჯელაღსრულების დაწესებულებიდან დაიწყო და ის სხვა ციხეების მსჯავრდებულებზეც გავრცელდა.

არეულობა იყო ასევე ქვეყნის სამხრეთში მდებარე ფოგიას ციხეში, საიდანაც 50-მა მსჯავრდებულმა გაქცევა მოახერხა, თუმცა ყველა მათგანი მალევე დააკავეს.

მილანში სან ვოტორეს ციხეში პატიმრებმა ცეცხლი გააჩინეს და შენობის სახურავზე ავიდნენ. abcnews-ის ცნობით, რომში 20-მა პატიმარმა სამკურნალო დაწესებულებაში შეაღწია და მეტადონის ჭარბი დოზის მიღების გამო, ექვსი მათგანი გარდაიცვალა.

იტალიაში კორონავირუსის გამო რთული ვითარებაა. ქვეყნის მთელი ტერიტორია წითელ ზონად გამოცხადდა და კარანტინი დაწესდა. ამის შესახებ იტალიის პრემიერ-მინისტრმა ჯუზეპე კონტემ საგანგებო მიმართვაში განაცხადა.

ქვეყანა კორონავირუსის გამო საკარანტინო ზომებს ამკაცრებს, რომელიც მთელი ქვეყნის მასშტაბით საზოგადოებრივ თავშეყრას კრძალავს.

პრემიერ-მინისტრი აცხადებს, რომ გადაადგილება შესაძლებელი იქნება მხოლოდ მაშინ, როცა ის სამუშაოს, ან გადაუდებელ საჭიროებას უკავშირდება. მისივე განცხადებით, ზომები საზოგადოების დასაცავადაა შემოღებული.