როგორ უნდა შეამოწმოთ, იბანენ თუ არა ბავშვები სკოლაში ხელებს - ამერიკელი პედაგოგის ამ მეთოდმა ინტერნეტი აალაპარაკა

იმისთვის, რომ კორონავირუსით დაინფიცირების რისკები შევამციროთ, ჰიგიენის წესების დაცვა, განსაკუთრებით კი ხელების ხშირად დაბანა უმნიშვნელოვანესია - ეს უკვე ყველამ კარგად ვიცით.

რამდენად იცავენ ბავშვები ჰიგიენის წესს და რამდენად ხშირად იბანენ ისინი ხელებს, ამის გაკონტროლება რთულია და ბევრი მშობელი და მასწავლებელი გამოწვევის წინაშე დგას. ამერიკელმა მასწავლებელმა კი, რომელიც მესამე კლასელებს ასწავლის, უჩვეულო მეთოდი მოიფიქრა, რომელიც მისი თქმით, ამართლებს.

29 წლის მისურელი მასწავლებელი შაუნა ვუდსი, ყოველ დილით მოსწავლეებს ხელებზე სპეციალურ ბეჭედს უკეთებს, რომელიც ძნელად შორდება.

დღის ბოლოს კი ის მოსწავლე იქნება გამარჯვებული, რომელსაც ხშირად დაბანის შედეგად ბეჭდის ნიშანი მოშორებული ექნება. გამარჯვებული მოსწავლე პრიზსაც მიიღებს.

ამ მეთოდის შესახებ მასწავლებელმა "ფეისბუქის" პირად გვერდზე განაცხადა და მშობლების აღფრთოვანება გამოიწვია. მის პოსტს ამ დროისთვის 85 ათასი გაზიარება და 8 ათასამდე კომენტარი აქვს.

მასწავლებელი ამბობს, რომ ცდილობს ყველაფერი გააკეთოს საფრთხის თავიდან ასაცილებლად.

"ფაქტია, რომ ბავშვები ერთმანეთთან მჭიდრო კავშირში არიან და ერთმანეთს სხვა რაღაცებთან ერთად, ბაქტერიებსა და ვირუსებსაც უზიარებენ. უკვე წლებია მაქვს ბეჭედი წარწერით Mrs. Woods, რომელსაც წიგნებისთვის ვიყენებ. ახლა კი გადავწყვიტე, რომ ეს ხელების დაბანის გასაკონტროლებლად გამოვიყენო.

დილით ხელზე ამ ბეჭედს ვუკეთებ ყველა მოსწავლეს, ხოლო საღამოს გამარჯვებულს ვავლენთ. ვინც ხელებს ხშირად დაიბანს, მას ბეჭედი მოშორებული ექნება" - ამბობს პედაგოგი.