აშშ კორონავირუსის საწინააღმდეგო ვაქცინის კლინიკური ვერსიის ადამიანებზე გამოცდას იწყებს

აშშ-ში იწყება კორონავირუსის საწინააღმდეგო ვაქცინის კლინიკურ ვერსიის გამოცდა ადამიანებზე. ამის შესახებ გამოცემა Independent აშშ-ის ოფიციალურ პირებზე დაყრდნობით წერს.

პირველი ადამიანი ექსპერიმენტულ ვაქცინას დღეს მიიღებს, ვაქცინაცია სიეტლში ჩატარდება. აღსანიშნავია, რომ სატესტო ვერსია გამოიცდება ჯანმრთელ მოხალისეებზე, რომლებიც კორონავირუსით ინფიცირებულები არ არიან. მედიკოსები შეამოწმებენ, აქვს თუ არა რაიმე გვერდითი ეფექტი ვაქცინას.

როგორც Associated Press წერს, ყოველივეს აშშ-ის ჯანმრთელობის ეროვნული ინსტიტუტი აფინანსებს.

იმ შემთხვევაში, თუ სატესტო ვერსია წარმატებული აღმოჩნდება, ვაქცინის საბოლოო ვერსიის შექმნას ერთ წელზე მეტი დასჭირდება.

ამ ეტაპზე მსოფლიოში დამოუკიდებლად რამდენიმე ფარმაკოლოგიური კომპანია მუშაობს კორონავირუსის საწინააღმდეგო ვაქცინის შექმნაზე (წაიკითხეთ: როდის გამოიგონებენ კორონავირუსის საწინააღმდეგო ვაქცინას - ფარმაცევტული კომპანიები მის შესაქმნელად მილიონებს ხარჯავენ)

ახალი ტიპის კორონავირუსი, Covid-19, უკვე მსოფლიოს 141 ქვეყანაშია გამოვლენილი. ვირუსით 173 111 ადამიანი დაინფიცირდა, საიდანაც 77 785 პაციენტი გამოჯანმრთელდა, ხოლო 6 664 გარდაიცვალა.