"თუ ასე გაგრძელდა, ათ დღეში რუსეთში 2 მილიონამდე ინფიცირებული იქნება" - რუსი პოლიტოლოგის მტკიცებით, პუტინის ხელისუფლება კორონავირუსზე ინფორმაციას მალავს

ცნობილი რუსი პოლიტოლოგი ვალერი სოლოვეი სკანდალურ ინფორმაციას აჟღერებს და ირწმუნება, რომ რუსეთში კორონავირუსით ინფიცირებულთა რაოდენობამ უკვე მიაღწია 150-180 ათას ადამიანს, დაღუპულთა რიცხვი კი - 1600 ადამიანს აღწევს. მისივე თქმით, ეს ყველაფერი რუსეთში იანვრის თვიდან ხდება.

როგორც სოლოვეიმ რადიო Эхо Москвы-ის ეთერში განაცხადა, რუსეთის ხელისუფლება მალავს და ქვეყანაში ბევრად მძიმე სიტუაციაა COVID-19-ის კუთხით. სოლოვეის თქმით, ყველა ჩინოვნიკს არ დაუკარგავს სინდისი და ეს ინფორმაცია მას კულუარებიდან აქვს.

სოლოვეიმ რუსეთში ახლა არსებული ვითარება ჩერნობილის კატასტროფის შემდეგ, ინფორმაციის დამალვას შეადარა და აღნიშნა, რომ ამით რუსეთის ხელისუფლება ცდილობს, დემონსტრირება გაუკეთოს იმას, რომ მისი პოლიტიკური და სამედიცინო მენეჯმენტი მისაბაძია.

"თუ ამ დინამიკით გაგრძელდება ინფექციის გავრცელება, ათ დღეში რუსეთში 2 მილიონამდე ინფიცირებული იქნება" - განაცხადა პოლიტოლოგმა.

აღსანიშნავია, რომ 17 მარტის მონაცემებით რუსეთის ფედერაციაში ოფიციალურად დარეგისტრირებულია კორონავირუსით ინფიცირების 114 შემთხვევა, გარდაცვილების შესახებ კი ხელისუფლება არაფერს ამბობს.

კორონავირუსმა მსოფლიოს 115 ქვეყანა მოიცვა, ინფიცირებულია 190 000-მდე ადამიანი.