მალაიზიის მთავრობამ ქალებს მოუწოდა, კარანტინის დროს სახლში მაკიაჟით იარონ და ქმრები არ გააღიზიანონ

მალაიზიის ქალთა სამინისტრომ ქალებს მოუწოდა მკაცრი კარანტინის რეჟიმის პირობებში, სახლში გამოპრანჭულებმა იარონ და ქმრები არ გააღიზიანონ.

Reuters იუწყება, რომ აღნიშნული ინფორმაციის გავრცელებას ადგილობრივ საზოგადოებაში ხელისუფლების კრიტიკა მოჰყვა - ის სექსიზმში დაადანაშაულეს.

ონლაინ-პოსტერების სერიაში #WomenPreventCOVID19, რომელიც მალაიზიის ქალთა საქმეების სამინისტრომ 18 მარტიდან გამოსცა, ქალებისთვის იყო რჩევები, როგორ აერიდებინათ საოჯახო კონფლიქტები თვითიზოლაციის პირობებში.

კამპანიის ერთ-ერთ პოსტერზე ასახული იყო დივანზე მოკალათებული მამაკაცი, ქალებისადმი რჩევა კი იმაში გამოიხატებოდა, რომ ნუ იქნებიან "სარკასტულები" თავიანთი ქმრების მიმართ, როცა მათ სახლის საქმეებში დახმარებას მოსთხოვენ.

შემდეგი პოსტერი კი მოუწოდებდა ქალებს მკაცრი კარანტინის პირობებში ქმრები არ გაეღიზიანებინათ, სახლში გამოპრანჭულებს ევლოთ და მაკიაჟი გაეკეთებინათ.

პოსტერებმა ადგილობრივი და მსოფლიო ქალთა უფლებადამცველების სასტიკი კრიტიკა, ასევე საზოგადოების აღშფოთება დაიმსახურა. მკაცრი კრიტიკის შემდეგ, სამინისტრომ ბოდიში მოიხადა და განაცხადა, რომ მსგავსი კამპანიის მიზანი "ოჯახის წევრებს შორის პოზიტიური ურთიერთობების შენარჩუნება იყო".

ცნობისთვის, მალაიზიაში მთელი ქვეყნის მასშტაბით მკაცრი კარანტინია გამოცხადებული. ქვეყანაში ამ დროისთვის კორონავირუსის 2900-ზე მეტი შემთხვევაა აღრიცხული.