გაირკვა, რომ ნორვეგიის ციხეში მყოფ ქართველ პატიმარს კორონავირუსი საერთოდ არ ჰქონია

ნორვეგიის ციხეში მყოფ ქართველ პატიმართან დაკავშირებით საქართველოს საგარეო საქმეთა სამინისტრო მის მიერ გავრცელებულ ინფორმაციაზე განმარტებას აკეთებს.

როგორც „ინტერპრესნიუსს“ უწყებიდან აცნობეს, თავდაპირველად მათ მიერ საინფორმაციო სააგენტოსთვის მოწოდებული ინფორმაცია, რომ საქართველოს მოქალაქეს ციხეში კორონავირუსი აქვს, არ დასტურდება.

როგორც უწყებაში აღნიშნავენ, პატიმარს კორონავირუსის სიმპტომები აღენიშნებოდა და თვითიზოლაციაში იმყოფებოდა.

„ნორვეგიის საპატიმრო დაწესებულებაში მყოფ საქართველოს მოქალაქეს კორონავირუსი არ დაუდასტურდა. მას აღენიშნებოდა ტემპერატურა, იმყოფებოდა იზოლაციაში და კვლევის შედეგების საფუძველზე არ დაუდასტურდა ვირუსი“, - აღნიშნავენ უწყებაში.

ცნობისთვის, საგარეო საქმეთა სამინისტრომ „ინტერპრესნიუსის“ მიერ გამოთხოვილი ინფორმაციის საფუძველზე გვაცნობა, რომ „ამ დროისათვის უცხო ქვეყნის საპატიმროებში საქართველოს მოქალაქე პატიმრის დაინფიცირების მხოლოდ ერთი ფაქტია ცნობილი - ნორვეგიის საპატიმრო დაწესებულებაში, რომელსაც უტარდება სათანადო სამედიცინო მკურნალობა“.