"იუვენტუსის" ფეხბურთელს, პაოლო დიბალას კორონავირუსი 6 კვირაში 4-ჯერ დაუდასტურდა

ტურინის "იუვენტუსის“ არგენტინელ ფეხბურთელს, პაოლო დიბალას კორონავირუსის ახალი შტამი, COVID-19 6 კვირაში 4-ჯერ დაუდასტურდა. ამის შესახებ CNN ფეხბურთელთან დაახლოებულ წყაროზე დაყრდნობით წერს.

"ის ახლა თავს კარგად გრძნობს, სიმპტომები არ აქვს და ვარჯიშობს კიდეც, მაგრამ კორონავირუსზე ტესტი კვლავ დადებითია“, - ამბობს წყარო.

არგენტინელმა ფეხბურთელმა და მისმა მეგობარმა გოგონამ, ორიანა საბატინიმ 21 მარტს სოციალური ქსელების საშუალებით გულშემატკივრებს აცნობეს, რომ კორონავირუსით იყვნენ ინფიცირებულნი.

როგორც ცნობილია, დიბალა ვარჯიშზე გახდა ცუდად, რის შემდეგაც მას COVID-19-ზე ტესტი ჩაუტარეს. მოგვიანებით ფეხბურთელმა დაავადების სიმპტომებზე ისაუბრა და აღნიშნა, რომ ძალიან რთული პერიოდი გაიარა, ამბობდა, რომ კუნთების ძლიერ ტკივილს გრძნობდა და სუნთქვა უჭირდა.

პაოლო დიბალა ერთ-ერთია "იუვენტუსის“ სამი ფეხბურთელიდან, რომლებსაც კორონავირუსი დაუდასტურდათ. COVID-19 აღმოაჩნდა იტალიელ მცველს დანიელე რუგანის და ასევე ფრანგ ნახევარმცველს,ბლეზ მატუიდის.

"იუვენტუსმა“ აპრილის დასაწყისში ოფიციალურად გაავრცელა ინფორმაცია იმის შესახებ, რომ რუგანი და მატუიდი სრულად გამოჯანმრთელდნენ.