ევროპას იმედი გაუჩნდა - ცხელი წერტილები, სადაც COVID-19-ით ინფიცირებულთა  და გარდაცვლილთა რაოდენობა ყოველდღე იკლებს

კორონავირუსის პანდემიის შესაჩერებლად უკვე რამდენიმე თვეა ადამიანები მთელ მსოფლიოში მკაცრი შეზღუდვების პირობებში ცხოვრობენ. COVID-19-ით გლობალური მასშტაბით უკვე თითქმის 5 მილიონი ადამიანი დაინფიცირდა, რომელთა შორისაც, 316 753 პაციენტი გარდაიცვალა.

დიდი გავლენა მოახდინა ვირუსმა ევროპულ განვითარებულ ქვეყნებზეც, სადაც ყოველდღიურად ათიათასობით ახალი ინფიცირებისა და ათასობით გარდაცვალების შემთხვევა ფიქსირდებოდა. დღეს კი უკვე საუბრობენ იმაზე, რომ ევროპას იმედი გაუჩნდა, რადგანაც შეზღუდვებმა გარკვეული შედეგი გამოიღო და ზოგიერთ ქვეყანაში ყოველდღიურად იკლებს როგორც ახალი ინფიცირებულების, ასევე გარდაცვლილთა რაოდენობაც.

ქვეყნები ეტაპობრივად ხსნიან შეზღუდვებს და მუშაობენ გეგმაზე, რომელმაც ადამიანებს ძველებური ცხოვრება უნდა დაუბრუნონ, თუმცა ბევრს საუბრობენ იმაზე, რომ მსოფლიო აღარ იქნება ისეთი, როგორიც აქამდე იყო.

ვნახოთ ევროპის ქვეყნები, კორონავირუსის გავრცელების თვალსაზრისით ყველაზე ცხელი წერტილები, სადაც ბოლო დღეებია COVID-19-ით გარდაცვლილთა და ახალ ინფიცირებულთა კლების ტენდენცია შეინიშნება.

• ესპანეთი

ესპანეთი კორონავირუსით ინფიცირებულთა რაოდენობის მხრივ, მსოფლიოში მესამე ქვეყანაა, თუმცა აქ ბოლო დღეებია ახალი შემთხვევების რაოდენობა იკლებს, ასევე ყოველდღიურად მცირდება გარდაცვლილთა რიცხვიც.

ესპანეთში გასულ ოთხი დღეში COVID-19-ით გარდაცვლილთა სტატისტიკა ასეთია:

• 14 მაისი - 217 შემთხვევა
• 15 მაისი - 138 შემთხვევა
• 16 მაისი - 104 შემთხვევა
• 17 მაისი - 87 შემთხვევა

აღსანიშნავია, რომ იკლო ახალი ინფიცირებულების რაოდენობამაც. თუ 16 მაისს 2138 შემთხვევა გამოვლინდა, გუშინ, 17 მაისს 1214 შემთხვევაა დადასტურებული. საერთო ჯამში კი, ესპანეთში კორონავირუსით 277 719 ადამიანი დაინფიცირდა, რომელთა შორისაც 27 650 პაციენტი გარდაიცვალა.

• იტალია

ინფიცირებულთა რაოდენობის მიხედვით, იტალია მსოფლიოს მეექვსე ქვეყანაა. ბოლო დღეებია კორონავირუსით გარდაცვლილთა რაოდენობა აქაც მცირდება. გასული 4 დღის სტატისტიკა კი ასე გამოიყურება:

• 14 მაისი - გარდაცვალების 262 შემთხვევა
• 15 მაისი - გარდაცვალების 242 შემთხვევა
• 16 მაისი - 153 შემთხვევა
• 17 მაისი - 145 შემთხვევა

იტალიაში მკვეთრად იკლო ახალი ინფიცირებულების რაოდენობამაც. ქვეყანაში 16 მაისს 153 ახალი შემთხვევა, ხოლო 17 მაისს 145 შემთხვევა გამოვლინდა. საერთო ჯამში კი, იტალიაში კორონავირუსით 225 435 დაინფიცირდა და მათ შორის 31 908 პაციენტი გარდაიცვალა.

• საფრანგეთი

კლების ტენდენცია შეინიშნება საფრანგეთშიც, თუმცა არა კორონავირუსით გარდაცვლილთა, არამედ ახალი ინფიცირებულების კუთხით. ქვეყანაში ინფიცირების ათასზე მეტი შემთხვევა 8 მაისს გამოვლინდა. მას შემდეგ კი ახალი შემთხვევები იკლებს. 17 მაისს საფრანგეთში COVID-19-ის 204 ახალი ინფიცირებული აღწერეს.

• გერმანია

კიდევ ერთი ევროპული ქვეყანა, სადაც კორონავირუსით გარდაცვლილთა რაოდენობა ყოველ დღე იკლებს და ასევე ახალი ინფიცირებულების რაოდენობაც მცირდება, გერმანიაა.

გერმანიაში COVID-19-ით გარდაცვლილთა გასული 4 დღის სტატისტიკა ასეთია:

• 14 მაისი - გარდაცვალების 67 შემთხვევა
• 15 მაისი - გარდაცვალების 73 შემთხვევა
• 16 მაისი - გარდაცვალების 26 შემთხვევა
• 17 მაისი - გარდაცვალების 22 შემთხვევა.

რაც შეეხება ახალ ინფიცირებულებს, ქვეყანაში16 მაისს COVID-19-ის 545 შემთხვევა გამოვლინდა, ხოლო 17 მაისს - 407. საერთო ჯამში, 176 651 ადამიანი დაინფიცირდა, პაციენტთა შორის 8 049 გარდაიცვალა.