უხანში კორონავირუსმა 2019 წლის აგვისტოში იფეთქა? - თანამგზავრიდან მიღებული მონაცემების მიხედვით, ჰარვარდში სკანდალური კვლევა მოამზადეს

მსოფლიო კორონავირუსის პანდემიას 11 მარტიდან ებრძვის და ამ დრომდე ვირუსთან დაკავშირებული ძალიან მცირე რაოდენობის კითხვებზე აქვთ ოფიციალურ პირებს ზუსტი პასუხები.

სხვადასხვა მოსაზრებები არსებობს ვირუსის წარმოქმნის შესახებ. ზოგიერთი კვლევა აჩვენებს, რომ ის ბუნებრივად გაჩნდა, თუმცა არიან მკვლევარები, რომლებიც ამბობენ, რომ COVID-19 ხელოვნურად შექმნეს უხანის ლაბორატორიაში. ჯერჯერობით ვირუსის საწინააღმდეგოდ არ არსებობს არც ვაქცინა და არც მედიკამენტი.

არც ის არის ცნობილი, ზუსტად როდის წარმოიქმნა ახალი ტიპის კორონავირუსი. ჩინეთისა და ჯანდაცვის მსოფლიო ორგანიზაციის მონაცემებს თუ დავეყრდნობით, 2019 წლის მიწურულს უხანში გაჩნდა პნევმონია, უცნობი მიზეზით. ხოლო ის, რომ საქმე ახალი ტიპის კორონავირუსს ეხებოდა, 2020 წლის იანვარში დადასტურდა.

ჰარვარდში ჩატარებულმა კვლევამ კი COVID-19-ის გავრცელების დაწყებასთან დაკავშირებით სკანდალური შედეგი აჩვენა. კვლევის მიხედვით, შესაძლოა, უხანში ვირუსმა გაცილებით ადრე, 2019 წლის აგვისტოში იფეთქა.

მკვლევართა თქმით, თანამგზავრით გადაღებული ფოტოები აჩვენებს, რომ ჩინეთის ქალაქ უხანის 5 საავადმყოფოსთან 2019 წლის აგვისტოს მიწურულიდან მნიშვნელოვნად გაიზარდა ავტომობილების რაოდენობა. ამის შესახებ BBC წერს. ყოველივეს თან ერთვოდა ინტერნეტსაძიებო სისტემებში ისეთი სიტყვების ძიების გაზრდა, როგორებიცაა "ხველება“ და "დიარეა“ (კორონავირუსის სიმპტომები).

ჩინეთი კვლევის შედეგს "სასაცილოს“ უწოდებს და აცხადებენ, რომ ის "ზედაპირულ“ ინფორმაციას ემყარება.

• ჰარვარდში ჩატარებული კვლევის დეტალები

მკვლევარებმა შეისწავლეს თანამგზავრიდან მიღებული მონაცემები უხანის 5 საავადმყოფოს გარე პერიმეტრზე და შეადარეს წინა ზაფხულის მონაცემებს. მეტი სიცხადისთვის - მათ შეადარეს 2019 წლის ზაფხულის მიწურულისა და შემოდგომის მონაცემები 2018 წლის ანალოგიური პერიოდის მაჩვენებელს.

2018 წლის ოქტომბრის ერთ-ერთ დღეს უხანის ერთ-ერთ საავადმყოფოსთან მკვლევარებმა 171 მანქანა დათვალეს, ამავე ადგილას 2019 წლის ანალოგიურ პერიოდში 285 ავტომობილი იყო. კვლევის მიხედვით, ზოგიერთ საავადმყოფოსთან 2019 წლის აგვისტოს მიწურულსა და სექტემბერ-ოქტომბერში, მანქანების რაოდენობა 90%-ით არის გაზრდილი 2018 წლის ანალოგიურ პერიოდთან შედარებით.

ამასთან, აგვისტოდან ჩინურ საძიებო სისტემა Baidu-ში გაიზარდა იმ სიტყვების ძებნის რაოდენობა, რომლებიც კორონავირუსის სიმტომებს აღწერს.

"ეს ყველაფერი მიუთითებს, თუ რა ხდებოდა იმ დროს უხანში. ჯერ კიდევ ძალიან ბევრი კვლევაა საჭირო იმისთვის, რომ სრულად გაირკვეს, რა მოხდა და როგორ გავრცელდა ეს დაავადება ადამიანებში. ეს კვლევა, მხოლოდ ნაწილია. თუმცა მანქანების რაოდენობის ზრდა საავადმყოფოებთან იმაზე მეტყველებს, რომ საზოგადოებაში რაღაც მოხდა და ადამიანები ექიმებს მიმართავდნენ,“ - ამბობს კვლევის ხელმძღვანელი, ექიმი ჯონ ბრაუნშტეინი ABC news-სთან.

ჰარვარდის კვლევას გამოეხმაურა ჩინეთის საგარეო საქმეთა სამინისტროს წარმომადგენელი.

"მე ვფიქრობ, რომ სასაცილოა, წარმოუდგენლად სასაცილო ასეთი ზედაპირული დაკვირვების შედეგად ამ დასკვნის გაკეთება, ისეთი დაკვირვების მიხედვით, როგორიცაა მანქანების მოძრაობა“, - აცხადებენ ჩინეთის საგარეო საქმეთა სამინისტროში.

ამ დრომდე, გლობალური მასშტაბით, კორონავირუსით 7.6 მილიონი ადამიანი დაინფიცირდა. გარდაიცვალა 423 887 პაციენტი, ხოლო გამოჯანმრთელებულთა რაოდენობა 3.8 მილიონს აღწევს. COVID-19-ით ინფიცირებულთა რაოდენობის მიხედვით მსოფლიოს პირველი ათი ქვეყანა ასეთია: აშშ, ბრაზილია, რუსეთი, ინდოეთი, დიდი ბრიტანეთი, ესპანეთი, იტალია, პერუ, გერმანია და ირანი.