"ქვეყანა პანდემიის ყველაზე ცუდ მომენტშია" - ბრაზილიაში ბოლო 24 საათში კორონირუსით 2000-ზე მეტი ადამიანი გარდაიცვალა

მსოფლიოს კვლავ კორონავირუსის პანდემიის გამო დაწესებული შეზღუდვებით ცხოვრობს. ზიგიერთი ქვეყანა წარმატებით ებრძვის ვირუსს, ზოგან კი კვლავ რთული ვითარებაა. ამ დროისთვის ერთ-ერთი ყველაზე მძიმე სიტუაცია ეპიდემიოლოგიური თვალსაზრისით, ბრაზილიაშია.

გასული დღე-ღამის განმავლობაში იქ კორონავირუსით 2 286 ადამიანი დაიღუპა, რაც რეკორდულად მაღალი დღიური მაჩვენებელია ქვეყნისთვის პანდემიის დაწყების დროიდან. ინფორმაციას BBC ავრცელებს.

გამოცემის ცნობით, ბრაზილიაში, კოვიდ 19-სგან დაღუპულთა საერთო რაოდენობა 268 370-მდე გაიზარდა. ამასთან, ქვეყანაში, ბოლო დღე-ღამეში, ინფიცირების 79 876 ახალი შემთხვევა გამოვლინდა.

ექსპერტები შემთხვევების ზრდას კორონავირუსის ახალ, უფრო გადამდებ ვარიანტს უკავშირებენ. ბრაზილიის საზოგადოებრივი ჯანდაცვის ცენტრი Fiocruz-ი აცხადებს, რომ შემთხვევების მოზღვავებამ ბრაზილიის უდიდესი ქალაქების უმრავლესობაში ჯანდაცვის სისტემები უზარმაზარი ზეწოლის ქვეშ დააყენა.

"ქვეყანა პანდემიის ყველაზე ცუდ მომენტშია, 2021 წელი ძალიან მძიმე იქნება,“ -აღნიშნა ცენტრის ექიმმა და მკვლევარმა მარგარეტ დალკოლმომ.

მედიის ცნობით, ქვეყნის დიდ ქალაქებში რეანიმაციული განყოფილებები გადატვირთულია. ამასთან ბრაზილიის ზოგიერთ რეგიონში ვაქცინაცია მიმდინარეობს, თუმცა ყველგან არა. ეპიდემოლოგები კი მის აუცილებლობაზე საუბრობენ და ამბობენ, რომ თუკი აცრა ყველა რეგიონში არ დაიწყება, კიდევ უფრო დიდი ტრაგედიაა მოსალოდნელი.