"მე არ მსურს ეს საქმე.. მე არ მსურს იქ ყოფნა" - პრინცმა ჰარიმ სამეფო ოჯახში ცხოვრება "თრუმენის შოუს" და ზოოპარკში ცხოვრებას შეადარა

პრინცმა ჰარიმ ბრიტანულ სამეფო ოჯახთან ურთიერთობაზე კიდევ ერთხელ ისაუბრა და ამჯერად ეს დექს შეპარდის პოდკასტში გააკეთა. ჰარიმ სამეფო ოჯახში ცხოვრება ფილმ "თრუმენის შოუს" და ზოოპარკში ცხოვრებას შეადარა.

სასექსის ჰერცოგი ამბობს, რომ სამეფო ოჯახის წევრი ჰგავს იმ კაცს, რომელიც მოულოდნელად აღმოაჩენს, რომ რეალით შოუშია და რომ გარშემო მხოლოდ სიყალბეა. ჰარის თქმით, 20 წლის იყო, როდესაც უკვე ფიქრობდა, სამეფო მოვალეობებზე უარი ეთქვა.

• "მე არ მსურს ეს საქმე (სამეფო მოვალეობები), მე არ მსურს იქ ყოფნა, მე არ მსურს იმ ყველაფრის გაკეთება. შეხედეთ, ყოველივემ სადამდე მიიყვანა დედაჩემი“, - ამბობს ჰარი.

მანვე გაიხსენა 1997 წელი, როდესაც პრინცესა დაიანა ტრაგიკულად გარდაიცვალა.

"როგორ შევძლებ ვიცხოვრო მშვიდად იქ ჩემს ცოლთან და ოჯახთან ერთად, როდესაც ვიცი, რომ შეიძლება იგივე კვლავ განმეორდეს?! იმიტომ, რომ ეს მართლა ვიცი. მე გავლილი მაქვს ეს ყველაფერი, ვიცი იქ რაც ხდება და არ მინდა მისი ნაწილი ვიყო. ვფიქრობ, რომ ეს მართლაც საშიში ადგილია....“, - ამბობს პრინცი.

მისივე თქმით, ადამიანები ფიქრობენ, რომ სამეფო ოჯახის წევრობა პრივილეგიაა, მაგრამ სინამდვილეში, იქ ცხოვრება არჩევანის გარეშე ცხოვრებას ნიშნავს.

ჰარიმ ისაუბრა ასევე მამაზე, ჩარლზზე და თქვა, რომ თავად თუკი დაინახავს, რომ მის შვილებს რაიმე სტკივათ, რაიმეზე დარდობენ, ყველაფერს გააკეთებს მათ გამო. "მსურს, დავანგრიო ყველა დაბრკოლება მათთვის", - აღნიშნავს ის.

• "მშობელმა ყველაფერი უნდა გააკეთოს შვილისთვის და იცით რა, ეს მე რომ დამემართა, ყველაფერი უნდა გავაკეთო, რომ ჩემმა შვილმაც იგივე არ გადაიტანოს", - ამბობს ჰარი.

პრინცმა ამერიკულ ცხოვრებაზეც ისაუბრა - "აქ ცხოვრებისას თავს სხვაგვარად ვგრძნობ. აქ შეგიძლია ისეირნო და ცოტა უფრო მეტი თავისუფლება იგრძნო. არჩის ველოსიპედზე უკან შემოვისვამ ხოლმე და ასე ვსეირნობთ...ამის შესაძლებლობა არასდროს მქონია."

ინფორმაციისთვის, პრინცი ჰარი და მისი ცოლი, მეგან მარკლი უკვე ერთ წელზე მეტია, რაც დიდი ბრიტანეთიდან წავიდნენ. ისინი აშშ-ში ცხოვრობენ. სამეფო ოჯახზე და სამეფო მოვალეობებზე უარის თქმის გამო, ჰარის ცუდი ურთიერთობა აქვს მამასთან და ძმასთან.

აღსანიშნავია, რომ მეგანმა და ჰარიმ ოპრა უინფრისთან ინტერვიუში ბრიტანეთში ცხოვრების სკანდალური დეტალები გაასაჯაროვეს. მათ შორის ისიც აღნიშნეს, რომ სამეფო ოჯახში რასისტი წევრებიც არიან, რომლებიც დარდობდნენ იმაზე, თუ რა ფერის კანი ექნებოდა ჰარისა და მეგანის შვილს.

წყვილი ბიჭუნას - არჩის ზრდის და მეორე შვილის, გოგონას მოლოდინში არიან.