"პატივს ვცემ ლუკაშენკოს... იმედი მაქვს, ერთ დღეს დავქორწინდები და შვილები მეყოლება" - ბელარუსში დაკავებული ჟურნალისტი ინტერვიუს დროს ატირდა

ბელარუსის სახელმწიფო ტელეარხმა ONT-მა გუშინ ინტერვიუ გაავრცელა, სადაც დაკავებული ჟურნალისტი, რომან პროტასევიჩი ანტისამთავრობო საპროტესტო აქციების ორგანიზებას აღიარებს და ალექსანდრე ლუკაშენკოს აქებს.

ჟურნალისტი აცხადებს, რომ პრეზიდენტ ლუკაშენკოს ბევრს აკრიტიკებდა, მაგრამ აცნობიერებს, რომ ის სწორად იქცეოდა და ახლა პატივს სცემს მას.

ინტერვიუს ბოლოს ცრემლმორეული ჟურნალისტი ამბობს, რომ იმედი აქვს, ერთ დღეს დაქორწინდება და შვილები ეყოლება.

ინტერვიუს გამოეხმაურა ჟურნალისტის მამა, რომელიც აცხადებს, რომ ინტერვიუ იძულების ქვეშ არის ჩაწერილი.

"მე ჩემს შვილს კარგად ვიცნობ და მჯერა, რომ ის არასდროს იტყოდა ასეთ რამეს. მათ ის გატეხეს და ის ათქმევინეს, რაც სჭირდებოდათ ", - თქვა მან AFP-თან ინტერვიუში.

ამასთან, ბელარუსული უფლებადამცველი ორგანიზაცია "ვესნაც“ აცხადებს, რომ ინტერვიუ ზეწოლის ქვეშ არის ჩაწერილი.

"ყველაფერი, რასაც პროტასევიჩი ამბობს, ზეწოლის ქვეშ იყო ნათქვამი. მინიმუმ, ფსიქოლოგიური ზეწოლის ქვეშ. ნამდვილი პროპაგანდაა, რომელსაც საფუძველი არ გააჩნია“, - განაცხადა უფლებადამცველი ცენტრის ხელმძღვანელმა, ალეს ბელიაცკიმ.

შეგახსენებთ, თვითმფრინავი, რომელიც ათენი ვილნიუსის რეისს ასრულებდა და რომელშიც რომან პროტასევიჩი იჯდა, 23 მაისს მინსკის აეროპორტში იძულებით დასვეს და ჟურნალისტი, მეგობარ გოგონასთან ერთად დააკავეს