"ბაქოში გაპარული ეპოტინებოდა სავარძელს, რომელიც გავრილოვს გაათბობინა... 20 ივნისის მოვლენებზე პასუხისმგებლობა კობახიძის კისერზეა" - ხუხაშვილი

ექსპერტი გია ხუხაშვილი მიიჩნევს, რომ 20 ივნისს განვითარებულ მოვლენებზე პოლიტიკური პასუხისმგებლობა ირაკლი კობახიძის კისერზეა.

ამის შესახებ ის "ფეისბუქზე" წერს.

"პოლიტიკური პასუხისმგებლობა 20 ივნისს განვითარებულ მოვლენებზე მთლიანად ირაკლი კობახიძის კისერზეა.

ის რომ გადამდგარიყო 20 რიცხვში, არც სპეცოპერაცია გახდებოდა საჭირო და არც დაზარალებულები გვეყოლებოდა.

ბაქოში გაპარული ეპოტინებოდა იმ სავარძელს, რომელიც გავრილოვს გაათბობინა და სანამ “მამიკომ” არ უთხრა, ვერ გაიმეტა" - წერს ხუხაშვილი.

ცნობისთვის, დღეს ირაკლი კობახიძემ განაცხადა, რომ ხარვეზები, რაც 20 ივნისის აქციის დაშლის პროცესში იყო, იმ ადამიანების პასუხისმგებლობაა, ვინც ეს ყველაფერი დაგეგმა.

მისი თქმით, პასუხისმგებლობა 20 ივნისის მოვლენებზე სამ ნაწილად იყოფა.

"პირველი იყო ის, რაც სხდომათა დარბაზში ჩატარებას მოჰყვა - იყო ჯერ გავრილოვის და შემდეგ ოპოზიციის პროვოკაცია. რა თქმა უნდა, ეს იყო ჩვენი შეცდომა, მათ შორის ჩემი შეცდომა, რაზეც პოლიტიკური პასუხისმგებლობა ავიღე. მეორე - იყო პარლამენტზე შტურმისა და შეჭრის მცდელობა. ეს იყო მთავარი დანაშაული, რაც იმ ღამეს ჩაიდინეს.

ეს არის ნიკა მელიასა და „ნაციონალური მოძრაობის“ პასუხისმგებლობა, ეს არის მათი პოლიტიკური პასუხისმგებლობა და სამართლებრივზე სამართალდამცავმა ორგანოებმა უნდა ისაუბრონ. რაც შეეხება ხარვეზებს, რაც დაშლის პროცესში იყო, ეს იყო იმ ადამიანების პასუხისმგებლობა, ვინც ეს ყველაფერი დაგეგმა“, - განუცხადა ჟურნალისტებს ირაკლი კობახიძემ.