”მის საქართველო - 2010”: მიყვარს შანელი, მისი ყველაფერი მომწონს

მოდასა და გემოვნებაზე "მის საქართველო-2010" დეა არაყიშვილი გვესაუბრება. დეამ წელს საქართველო "მის მსოფლიოზე" წარადგინა და სამშობლოში შთაბეჭდილებებით დატვირთული დაბრუნდა.

- ვინაიდან ოფიციალურ შეხვედრებზე ხშირად მიწევს სიარული, თითქმის ყოველთვის კლასიკურად მაცვია, თუმცა თავისუფალი სტილის სამოსში თავს უფრო კომფორტულად ვგრძნობ. მომწონს დაბალძირიანი ფეხსაცმელი და ჯინსი, თუმცა დიდი ხანია ამ სტილს დავემშვიდობე.

- ...და დღეს უკვე მაღალქუსლიანი ფეხსაცმელია შენი სტილის განუყოფელი ელემენტი?

- ცხადია, უმეტესად მაღალქუსლიანით დავდივარ. ჩემი ფეხსაცმლის ქუსლის მაქსიმალური სიმაღლე 8-10 სმ-ია. მომწონს წვრილი, კლასიკური ქუსლი, თუმცა ჩექმებზე სქელი თანამედროვე ქუსლიც დასაშვებად მიმაჩნია.

- ბევრი ქალი ფეხსაცმელს ჩანთას უხამებს...

- მიმაჩნია, რომ ქალის ჩაცმულობაში ორი-სამი ფერი უნდა დომინირებდეს, ამიტომ ვცდილობ, ჩანთა ფეხსაცმელსაც შევუხამო და სამოსის სხვა დეტალსაც.

- როგორია დეას ჩანთა?

- სრულიად სხვადასხვანაირი: ან ძალიან დიდი, ან ძალიან პატარა - ასეთს რამდენიმეს ვატარებ ერთდროულად (იცინის). თან უამრავი რამ დამაქვს, თმის საშრობით დაწყებული, მაღალქუსლიანი თუ დაბალძირიანი ფეხსაცმელებით დამთავრებული.

- სტუდენტი ხარ და, ალბათ, ჩანთაში წიგნებიც გიწყვია...

- ცხადია. მთელი დღის განმავლობაში იმდენი რამე მაქვს მოსასწრები, ტანსაცმლის გამოსაცვლელად შინ შერბენასაც ვერ ვახერხებ, ამიტომ როდესაც მნიშვნელოვან შეხვედრაზე მივდივარ, სამოსი, პარფიუმერია ჩანთაში მიდევს.

- შინიდან გასვლის წინ დიდხანს ფიქრობ, რა ჩაიცვა?

- ამაზე საღამოს, დაწოლამდე ვფიქრობ, თუმცა საბოლოო გადაწყვეტილებას მაინც დილით ვიღებ.

- მაკიაჟს ყოველდღიურად იკეთებ?

- ვიდრე სილამაზის კონკურსში მივიღებდი მონაწილეობას, მაკიაჟს არ ვიკეთებდი - ბუნებრივი სილამაზის მომხრე ვარ, მაგრამ ამჟამად მაკიაჟი ჩემთვის აუცილებელია, ამიტომ ვცდილობ, რაც შეიძლება მსუბუქად შევიღებო. მომწონს "ლანკომის", "შანელის" და "ივ სენ-ლორანის" პარფიუმერია.

- სუნამოს რომელს იპკურებ?

- "შანელი #5"-ის ერთგული ვარ. "შანელი" კლასიკაა, რომელიც მოდიდან არასდროს გადავა. მიყვარს ეს ბრენდი, მისი ყველაფერი მომწონს.

- "შანელისთვის" დამახასიათებელი შავისა და თეთრის შეხამებაც?

- შავისა და თეთრის შეხამება ძალიან მომწონს. ახლახან გარდერობს შევმატე წითელი ფერი, რაც, ალბათ, ჩინეთის გავლენაა. ჩინეთში უამრავი წითელი სამოსი შევიძინე. ასევე მომწონს კაკაოსფერი. ნაზი, ბაცი ფერები მირჩევნია.

- ესე იგი, საზამთროდ გარდერობი უკვე განიახლე. რაზე გააკეთე აქცენტი?

- ყურადღება ტყავის, ბეწვის ჟილეტებზე გავამახვილე, თუმცა ეს იმას არ ნიშნავს, რომ მოდას ბრმად მივდევ. მხოლოდ იმას ვყიდულობ, რაც მომწონს და მიხდება.

- ქართველი მოდის მესვეურების გემოვნებას ითვალისწინებ?

- რომ გითხრათ, ქართველი დიზაინერებით აღფრთოვანებული ვარ-მეთქი, მოგატყუებთ. ტენდენციები, რომლებსაც ისინი გვკარნახობენ, არ მიზიდავს. არც თბილისის მოდის კვირეულებს ვსტუმრობ. უცხოელი მაღალი მოდის წარმომადგენლების გემოვნებას ვენდობი. საქართველოშიც რამდენიმე ნიჭიერი დიზაინერია, რომელთა კოლექციებიც მომწონს, მაგრამ მათთან არ ვიკერავ.

- მაშინ ის უცხოელი დიზაინერი დაგვისახელე, რომლის ყოველი კოლექციაც მოგწონს.

- ვერავინ შეედრება ლუი ვიტონს, შანელს, მაქვს მათი რამდენიმე აქსესუარიც.

- აქსესუარებიდან ყველაზე ხშირად რომელს იყენებ?

- მიყვარს საყურეები და საათი. უსაათოდ შინიდან არ გავალ. სხვა აქსესუარები, მაგალითად, მძივები, სამაჯურები, დიდად არ მხიბლავს.

- სილამაზის სალონს ხშირად სტუმრობ?

- საკმაოდ ხშირად. მაკიაჟის ხელოვნება არ ვიცი, ამიტომ გადაღებებისთვის მაკიაჟს სალონში ვიკეთებ. ასევე ხშირად ვიწესრიგებ ფრჩხილებს და თმას.

- გამაჯანსაღებელ ცენტრებს?

- დავდივარ აუზზე, ტრენაჟორების დარბაზებში და მასაჟებზე, სიმართლე გითხრათ, გამაჯანსაღებელი ცენტრები ჩემი დღის რეჟიმის განუყოფელი ნაწილია.

- ფორმის შესანარჩუნებლად დიეტა ხომ არ გჭირდება?

- დატვირთული დღის რეჟიმი მაქვს, თითქმის მთელ დღეს ვმოძრაობ. გარდა ამისა, ტრენაჟორების, მასაჟებისა და ცურვის წყალობით დიეტის დაცვა არასდროს დამჭირვებია.

- პლასტიკურ ქირურგიას ემხრობი?

- თუ ადამიანს გარეგნული ნაკლი აქვს და ეს თრგუნავს, გალამაზება აუცილებელიც კი არის. თუმცა ზოგიერთს პლასტიკური ოპერაციის გაკეთება მანიად ექცა. უადგილო და სახის შეუსაბამო ცვლილებები ადამიანს კი არ ალამაზებს, ამახინჯებს.

- თუ გაგჩენია გარეგნობის შეცვლის სურვილი?

- ერთფეროვნებას ვერ ვეგუები, სიახლეები მიყვარს, ამიტომ ხშირად მომისურვებია, გარეგნობაში რამე შემეცვალა, მაგრამ ახლობლების თხოვნით გადამიფიქრებია.

- ვინ არის, შენი აზრით, ყველაზე გემოვნებიანი ქართველი ქალი?

- ჩემთვის იდეალი მაკა ასათიანია. ეს არის ქალი, რომელსაც ნაკლს ვერ უპოვი. გარდა იმისა, რომ ლამაზია, დახვეწილი გემოვნებაც აქვს.

ნათია მალიშავა

ყოველკვირეული გაზეთი ”ყველა სიახლე”

(გამოდის ხუთშაბათობით)