თამუნა ლეკვეიშვილი ზესტაფონელთა რისხვას გადაურჩა

"დეტექტივები არ მიყვარს; სხვა ყველანაირი ჟანრის ლიტერატურა შემიძლია წავიკითხო", - ამბობს "ვანოს შოუს" ბენდის ხელმძღვანელი, თამუნა ლეკვეიშვილი. ბავშვობაში წასაკითხ ლიტერატურას დედა ურჩევდა. 2-3 წლით უფროს ბავშვებთან მეგობრობდა და რჩევებს ისინიც ხშირად აძლევდნენ. წუხს, რომ მოუცლელობის გამო, ბოლო დროს წიგნების საკითხავად ვეღარ იცლის. სანამ ინტერვიუზე დამთანხმდებოდა, ცოტა იყოყმანა, - არ ვიცი, როგორი რესპონდენტი ვიქნებიო, - მაგრამ უარი მაინც არ მითხრა და შინ მიმიპატიჟა.

- ბოლოს რომელი წიგნი წაიკითხე?

- პაულო კოელიოს "თერთმეტი წუთი". მწერლის ენა და ფანტაზია მომეწონა. კარგი ნაწარმოებია.

- პოეზია გიყვარს?

- მიყვარს, მაგრამ პროზაზე მეტად - არა. გააჩნია, როგორ განწყობილებაზე ვარ.

- წიგნი მოგიპარავს?

- წიგნი - არა, მაგრამ ნოტები მომიპარავს.

- ვის მოჰპარე?

- (იცინის) არ გეტყვი. ახლაც შენახული მაქვს. პატრონმა ვერ გაიგო.

- რომელიმე პერსონაჟი თუ გიყვარს გამორჩეულად?

- არა, ასეთი გმირის დასახელება არ შემიძლია.

- სკოლაში ყველაზე კარგად რომელ საგანს სწავლობდი?

- ქართულ ენასა და ლიტერატურას და გეოგრაფიას. მათემატიკაც მიყვარდა, მაგრამ ბოლო წლებში მთლიანად მუსიკამ გამიტაცა და სხვა საგნებს ბევრ დროს ვეღარ ვუთმობდი.

- ახლახან მეორე შვილი შეგეძინა.

- დიახ, ნიკოლოზი 24 ნოემბერს დაიბადა. მშვიდი ბავშვია, არ ტირის, ღამეც კარგად სძინავს. მხოლოდ ეგ არის, რომ უფროსი შვილი ცოტა ეჭვიანობს. ნინის უნდა, რომ სულ მასთან ვიყო.

- "რუსთავი 2"-ის გასართობი შოუების სტუდია მალე ახალ სერიალს შემოგვთავაზებს. მუსიკალურ გაფორმებაზე შენ ზრუნავ?

- რა თქმა უნდა. მუსიკა უკვე დაწერილია, სცენარიც მზად არის. დეკორაციას ველოდებით და გადაღებას დავიწყებთ.

- დროა, კითხვარზე გადავიდეთ.

- ძალიან ვნერვიულობ.

- საქართველოს ეს ქალაქი ისტორიულ წყაროებში პირველად XVI საუკუნის 60-იან წლებში მოიხსენიება. XIX საუკუნის 20-იან წლებში იქ კაზაკთა ჯარის პოსტი იყო. ქალაქად 1926 წელს გამოცხადდა. მცირე ხნის მანძილზე რევოლუციონერ ჯუღელის სახელსაც ატარებდა; შემდეგ დაიბრუნა ისტორიული სახელწოდება. ის ზღვის დონიდან 160 მეტრის სიმაღლეზე მდებარეობს. დაასახელე, რომელ ქალაქზეა ლაპარაკი?

- ეს ისტორია ძალიან მეცნობა. დასავლეთ საქართველოშია?

- დიახ.

- ზესტაფონი ხომ არა?

- გამოიცანი.

- და ზესტაფონელთა რისხვას გადავურჩი!

- ეს კითხვა ნიკა გრიგოლიასაც დავუსვი და ვერ მიპასუხა. ზესტაფონში რა ასაკამდე ცხოვრობდი?

- 16 წლამდე. მერე თბილისში წამოვედი, ექსპერიმენტულ ათწლედში ვსწავლობდი. შემდეგ კითხვაზე გადავიდეთ.

- რომელ წელს ჩამოყალიბდა შვედური ჯგუფი "აბბა"?

- არ ვიცი, ზუსტ თარიღს ვერ დავასახელებ.

- 1972 წელს. ამ ჯგუფს არ უსმენ?

- რომ ვუსმენდე, თარიღიც მემახსოვრებოდა.

- "მე ვიცი ის, რომ არაფერი არ ვიცი". ეს...

- (მაწყვეტინებს) ვიცი, ეს სოკრატეს გამონათქვამია.

- დიახ, მინდა გკითხო, რას ამბობდა ამ სიტყვების შემდეგ?

- არ ვიცი.

- "...სხვებმა კი ესეც არ იციან".

- საინტერესოა (იცინის).

- რა ჰქვია შიშს ძაღლის მიმართ?

- არ მახსოვს. არადა, უნდა ვიცოდე, ძაღლების ძალიან მეშინია.

- კინოფობია ჰქვია.

- ვა! გული დამწყდა, რომ ვერ გიპასუხე, კინოლოგია მაინც გამხსენებოდა.

- ძაღლების გარდა, კიდევ რისი შიში გაქვს?

- ქათმის. არ შემიძლია შევეხო. დედაჩემიც ასეა, ეს გენეტიკურად მაქვს.

- ვინ დაწერა "რევიზორი" და "მკვდარი სულები"?

- გოგოლმა.

- ზესტაფონი, ქუთაისი, თბილისი, გორი - ამ ქალაქებიდან რომელია უძველესი?

- ქუთაისი.

- "ის მოიპოვება არა ნათესაური კავშირით, არამედ ინტერესთა ნათესაობით" - რის შესახებ ამბობდა ამას დემოკრიტე?

- არ ვიცი.

- მეგობრობის შესახებ. ცნობილია, რომ თავისუფლების ქანდაკება ფრანგი ხალხის საჩუქარია ამერიკის შეერთებული შტატების ხალხისადმი. იგი მოქანდაკე ფრედერიკ-ოგიუსტ ბარტოლდიმ შექმნა. ვინ გამოიყენა მან მოდელად?

- არც ეს ვიცი.

- საკუთარი დედა.

- კითხვები გამირთულე?

- არ გამირთულებია. რესპონდენტებმა რაც არ იციან, ის ყოველთვის რთულად ეჩვენებათ.

- აზარტში შევედი და ამ 2 კითხვას რომ ვერ ვუპასუხე, ცოტა მოვიწყინე.

- რატომ ატარებდა იულიუს კეისარი დაფნის გვირგვინს?

- ვერ გიპასუხებ.

- სიქაჩლის დასაფარავად.

- (იცინის) მე ეგეც არ ვიცოდი, ქაჩალი თუ იყო.

- ეს მუსიკალური საკრავი უხსოვარი დროიდან არის ცნობილი. შუა საუკუნეებში მას რომანტიკული ბალადების შესასრულებლად იყენებდნენ, ხოლო XVIII საუკუნეში სიმფონიური ორკესტრის შემადგენლობაში შევიდა. დაასახელე, რომელ ინსტრუმენტზეა ლაპარაკი?

- (ფიქრობს) არფაზე.

- 100 კილომეტრი მანძილის გასავლელად ავტომანქანას სჭირდება 8 ლიტრი ბენზინი. რამდენი ლიტრი საწვავი დასჭირდება ამავე ავტომანქანას 125 კილომეტრის გასავლელად?

- დავითვლი და გიპასუხებ. (პაუზის შემდეგ) 10 ლიტრი, ასე არ გამოდის?

- გამოიცანი. 1883-1884 წლებში სად სწავლობდა ვაჟა-ფშაველა და რატომ გახდა ის იძულებული, სწავლისთვის თავი დაენებებინა?

- პეტერბურგში სწავლობდა. რატომ დაანება თავი, ამის ზუსტი მიზეზი არ მახსოვს. მგონი, ხელმოკლეობის გამო.

- დიახ. "მუსიკა საგანძურია, სადაც ყველა ეროვნებას თავისი განძი შეაქვს", - რომელი კომპოზიტორია ამ გამონათქვამის ავტორი?

- მინიშნებას ვერ მეტყვი?

- ის რუსული კლასიკური მუსიკის წარმომადგენელი და არაერთი შედევრის ავტორია.

- პეტრე ჩაიკოვსკი.

- რომელ ბრძოლაში დაიღუპა 9 ძმა ხერხეულიძე?

- ვერ ვიხსენებ.

- მარაბდის ბრძოლაში. საქართველოს რომელი კუთხის შვილები არიან დავით კლდიაშვილის პერსონაჟები?

- იმერეთის.

- რომელია ზღვის დონიდან ყველაზე მაღლა მდებარე ქალაქი?

- მესტიის მხარეს იქნება.

- არა. ეს ქალაქი სვანეთში არ არის.

- რაჭაშია?

- არა.

- აბა, სად არის?

- სამცხე-ჯავახეთში.

- მართლა? არ ვიცი, რომელია?

- ახალქალაქი. ვინ მიიჩნევა ქართული საოპერო მუსიკის ფუძემდებლად?

- მელიტონ ბალანჩივაძე.

- "ამორძალივით მოჯირითე რაინდთა შორის", "ყინწვისის ანგელოსივით მჭმუნვარე", - რომელ პერსონაჟს ახასიათებს ასე კონსტანტინე გამსახურდია?

- შორენა კოლონკელიძეს.

- 1824 წელს პარიზში გამოვიდა ფრანგი დედოფლის - მარია ანტუანეტას მოდელიერი ქალის, მადმუაზელ ბეხტეინის მემუარები. რომელი ფრთიანი გამონათქვამის ავტორი გახდა ეს მოდელიერი მას შემდეგ, რაც დედოფლის ძველი კაბა განაახლა?

- ვერ გიპასუხებ.

- "ყველაფერი ახალი კარგად დავიწყებული ძველია".

- ვა! არ დავფიქრდი, თორემ ეს გამონათქვამი გამახსენდებოდა.

- წელიწადის რამდენი თვეა ისეთი, რომელიც 30 რიცხვს შეიცავს?

- არ ვიცი, მაგას ხელის მტევანზე ხომ თვლიან ხოლმე; მადროვე (ხელზე ითვლის)... 6 გამოდის.

- საინტერესოა, როგორ დაიანგარიშე?

- რა, ასე არ არის?

- აბა, ეს 6 თვე დამისახელე.

- იანვარი, აპრილი... რატომ იცინი?

- ძალიან დაიბენი.

- რატომ დავიბენი, ასეა, კარგად დაფიქრდი.

- ასეთი მხოლოდ ერთი...

- (მაწყვეტინებს) უი, უი, რა სისულელეს ვამტკიცებ. მხოლოდ თებერვალია (იცინის). ამის წაკითხვისას მკითხველი გამხიარულდება.

- ცნობილი ავტომრბოლელი შუმახერი მონაწილეობდა შემდეგი ლოზუნგის პროპაგანდაში: "ათი წამი, რომელმაც შეიძლება გადაარჩინოს თქვენი სიცოცხლე". რაში უნდა დაიხარჯოს ეს ათი წამი?

- მინიშნება რომ მითხრა, არ შეიძლება? დამეხმარე.

- არ მგონია, მინიშნების თქმა დაგჭირდეს, დაფიქრდი.

- (პაუზის შემდეგ) დავაზუსტებ: ამ რაღაცის გაკეთებას კანონი გვავალდებულებს?

- დიახ.

- მივხვდი - ღვედის შეკვრაზეა ლაპარაკი.

- "განგაში", "ხევისბერი გოჩა", "ნინო", "დათა თუთაშხია" - ამ ფილმებიდან რომლისთვის არ დაუწერია მუსიკა რევაზ ლაღიძეს?

- "დათა თუთაშხიასთვის".

- შეგიძლია, ამ ფილმის მუსიკის ავტორი დამისახელო?

- ბიძინა კვერნაძე.

- რომელ ჩიტს ადარებენ ახალი საქმის პირველად წამომწყებ, სიახლის შემომტან ადამიანს?

- მერცხალს: პირველი მერცხალიაო, ამბობენ ხოლმე.

- "ვეფხისტყაოსნის" რომელ გმირთან არის შედარებული ვეფხვი ამ სტრიქონში: "ხრმალი გავსტყორცნე, გარდვიჭერ, ვეფხვი შევიპყარ ხელითა, მის მიერ კოცნა მომინდა, ვინ მწვავს ცეცხლითა ცხელითა".

- ნესტან-დარეჯანს.

- რა ერქვა მდინარეს, სადაც პირველად ოქრო აღმოაჩინეს?

- ვიცოდი და ვეღარ ვიხსენებ.

- კლონდაიკი. დაბოლოს, დაასრულე გოეთეს ცნობილი გამონათქვამი: "თუ მიზნისკენ მიდიხარ და გზად შეჩერდები, რათა ყველა ძაღლს ქვა ესროლო, რომელიც გიყეფს, მიზნამდე..."

- "...მიზნამდე ვერასდროს მიხვალ".

თამუნა კვინიკაძე

ჟურნალი ”გზა”

(გამოდის ხუთშაბათობით)