ნინო ქათამაძე: "მინდა, რომ ყოველ დილით ჩემი შვილი მაღვიძებდეს"
მარტის შუა რიცხვებში ნინო ქათამაძე რუსეთის ქალაქ რიაზანში დიდი პრომო-ტურის ფარგლებში კონცერტს გამართავს. მომღერალი ჯგუფ INSIGHT-თან ერთად ახალ ალბომ GREEN-ს წარადგენს.
საინფორმაციო სააგენტო РИА "7 новостей" ქათამაძესთან ბლიც-ინტერვიუ ჩაწერა:
- რომელ ისტორიულ ეპოქაში ისურვებდით ცხოვრებას?
- ეპოქაში, როდესაც სიტყვებს მნიშვნელობა არ ჰქონდა. ვიცხოვრებდი ეპოქაში, როდესაც გენიალური კომპოზიტორები - ბახი და მოცარტი ცხოვრობდნენ, მოვუსმენდი მაილზ დევისს, დავესწრებოდი Woodstock-ის ფესტივალს, ურთიერთობა მექნებოდა ცვეტაევასთან და რილკესთან და, რა თქმა უნდა, ადამიანებთან, რომლებიც ამ ეპოქებს ქმნიდნენ.
- თქვენი საყვარელი ლიტერატურული, თეატრალური ან კინოპერსონაჟი?
- შერლოკ ჰოლმსი, რომელსაც ვასილი ლივანოვი ასახიერებს.
- ვინ არის ყველაზე სიმპათიური ჩვენს თანამედროვეებს შორის?
- ჩემი მუსიკოსები, ჩემი ბენდი, რომელიც 4 მამაკაცისგან შედგება. ისინი ჩემი ჯენტლმენები არიან, ჩემი ვაჟკაცები. მათ გვერდით ვაყენებ ნატალიასაც (ნატალია ლომონოსოვა - ჯგუფ ნინო ქათამაძისა & INSIGHT-ის დირექტორი).
- რა წიგნს წაიღებდით უკაცრიელ კუნძულზე?
- უკაცრიელ კუნძულზე არაფერს წავიღებდი. თუ ამ კუნძულზე არავის შევხვდებოდი, ლექსების წერას დავიწყებდი.
- რას აფასებთ ყველაზე მეტად მეგობრებში?
- ყველაზე მეტად მათში იუმორსა და სიცოცხლის სიყვარულს ვაფასებ. დანარჩენი გარემოებებზეა დამოკიდებული.
- რა სისუსტეს პატიობთ ადამიანს ყველაზე ადვილად?
- ადამიანს მხოლოდ პატიება მოეთხოვება, დანარჩენი თვისებები, რომლებსაც სიბრძნის წყალობით აგროვებს - კარგი "ოქროს ეგოიზმია".
- ვისთან ერთად ისურვებდით ლიფტში ხანგრძლივად გაჭედვას?
- რა თქმა უნდა, საყვარელ მეუღლესთან ერთად.
- რომელ სიტყვას ან გამოთქმას იყენებთ ყველაზე ხშირად?
- "თავი დამანებეთ", "მთელი დარბაზი ვმღერით", "სამი ოთხი, და...!", "მე თქვენ მიყვარხართ".
- ყველაზე უაზროდ ფული რაზე დაგიხარჯავთ?
- ფულს არ ვხარჯავ, 3 ლიტრიან ქილაში ვაგროვებ (ვხუმრობ). მე მხოლოდ ჩემს ფულს არ ვხარჯავ, ყველას ფულს ვხარჯავ, თქვენიც შემიძლია დავხარჯო.
- გიყვართ ფული?
- ეს რას ნიშნავს?
- თქვენი საყვარელი საქმიანობა?
- მთაში, ხის სახლში ყოფნა, "წვიმის ხმის" საუნდ-ტრეკთან ერთად.
- რა გღლით ყველაზე მეტად?
- საკუთარი თავი.
- თქვენი საყვარელი ქალისა და მამაკაცის სახელები?
- საყვარელი ადამიანების სახელები.
- თქვენი საყვარელი ქალაქები?
- თბილისი, მოსკოვი - მათი დათვალიერება მოვასწარი, ბათუმი - იმიტომ, რომ მშობლიურია. მომწონს ყველა ქალაქი, სადაც რამეს ვასწრებ, კონცერტის გარდა.
- თქვენი ყველაზე დიდი მიღწევა?
- ვაჟი. ნამდვილად ასეა.
- ნიჭი, რომლის ქონასაც ისურვებდით?
- ხატვა.
- რა გაკლიათ სრული ბედნიერებისთვის?
- მინდა, რომ ყოველ დილით ჩემი შვილი მაღვიძებდეს.
- რა არის თქვენი ცხოვრების დევიზი?
- სასწაულები ხდება.
მომზადებულია РИА "7 новостей"-ს მიხედვით.
სალომე ჭაჭუა უცხოეთში მიემგზავრება - რომელი ქვეყნის "ცეკვავენ ვარსკვლავებში" გამოჩნდება მოცეკვავე
"სადაც არ უნდა ყოფილიყო, ყოველთვის სახლში ბრუნდებოდა... თბილისში..." - რას წერს გენიალურ კომპოზიტორზე ხელოვნებათმცოდნე
