One Direction ევროპელი მაყურებლის რჩეული ბიჭები

One Direction ევროპელი მაყურებლის რჩეული ბიჭები

ბიჭების ჯგუფმა One Direction-მა ორი პრემია მიიღო ევროპული MTV-ის ახლახან გამართულ ცერემონიაზე. მუსიკალური კოლექტივი დააჯილდოვეს ყველაზე დიდი რაოდენობის თაყვანისმცემლებისთვის, ასევე ნომინაციაში "საუკეთესო სიახლე".

One Direction-ი ინგლისური ბოიბენდია, რომელიც 2010 წელს დაარსდა ლონდონში. ჯგუფის შემადგენლობაში ხუთი ახალგაზრდა ბიჭია - ჰარი სტაილსი, ლუი ტომლინსონი, ნაილ ჰორანი, ზეინ მალიკი და ლიამ პეინი. ეს მომღერლები უკვე იქცნენ თინეიჯერი გოგონების კერპებად, მოზარდი ბიჭები კი მათ ჩაცმის სტილსა და ვარცხნილობებში ჰბაძავენ.

ბიჭები მსოფლიოში ცნობილი შოუ  X factor-ის აღმოჩენები არიან, რის შემდეგაც მათით ხმის ჩამწერი კომპანიები დაინტერესდნენ. საინტერესოა, რომ აღნიშნულ შოუში ბიჭები ცალ-ცალკე მივიდნენ, შემდეგ კი შოუს მიწვეულმა მსაჯმა ნიკოლ შერზინგერმა მათ ჯგუფის შექმნა შესთავაზა. ორკვირიანი ერთობლივი მუშაობის შემდეგ ბიჭებმა თავი ერთად კარგად იგრძნეს და ჯგუფს სახელიც მოუფიქრეს - ეს სახელწოდება, მათი აზრით, მჟღერი და დასამახსოვრებელია.

მსოფლიო აღიარება მოიპოვეს სადებიუტო ალბომUp All Night-ის გამოშვების შემდეგ - 2012 წელს. სიმღერამ ამ ალბომიდან, What Makes You Beautiful, მსოფლიო ჩარტების ლიდერი პოზიციები დაიპყრო, ალბომი კი ამერიკული ბილბორდის პირველადგილოსანი გახდა. პირველად მოხდა, როცა ბრიტანული ჯგუფის სადებიუტო ალბომმა ასეთი მაღალი პოზიცია მოიპოვა ამერიკულ ჩარტში, რაც გინესის რეკორდების წიგნშიც აღნიშნეს.

ახალი ალბომი Taka Me Home 12 ნოემბერს გამოვიდა. მომავალ წელს ბიჭებს მსოფლიო ტურნეც აქვთ და­გეგმილი და მხოლოდ ავსტრალიასა და ახალ ზელანდიაში 15 მლნ დოლარის შეგროვებას გეგმავენ.

გარდა მუსიკალური მოღვაწეობისა, ბიჭები საქველმოქმედო ორგანიზაციებსა და ფონდებს აქტიურად ეხმარებიან და ცნობილი კომპანიების სარეკლამო აქციებშიც მონაწილეობენ.

ლიამ პეინი

ლიამ პეინი 1993 წლის 29 აგვისტოს ვულვერჰემპტონში დაიბადა, ინგლისში. დედამისს ნაადრევი მშობიარობა ჰქონდა და ახალდაბადებულ ბავშვს მხოლოდ ერთი თირკმელი დაჰყვა. სამედიცინო ჩარევის შემდეგ, ამჟამად ორი თირკმელი აქვს, თუმცა ერთი პრაქტიკულად არ მუშაობს. ლიამს ორი და ჰყავს. სკოლაში სწავლისას აქტიურად მონაწილეობდა სპორტულ შეჯიბრებებში. თავისი ადგილი მორბენალთა გუნდში მოიპოვა. როგორც ჰყვება ხოლმე, სკოლაში ხშირად დასცინოდნენ და შეურაცხყოფას აყენებდნენ, რის გამოც კრივზე დაიწყო სიარული და თავდაცვა ისწავლა. 14 წლიდან სერიოზულად დაინტერესდა მუსიკით. ამბობს, რომ ყველაზე დიდი გავლენა მასზე ჯასტინ ტიმბერლეიკმა მოახდინა. 2010-2012 წლებში ხვდებოდა მოცეკვავე დანიელა პიზერს.

ნაილ ჰორანი

ნაილ ჯეიმს ჰორანი 1993 წლის 13 სექტემბერს დაიბადა ირლანდიაში, მალინგარში. მშობლები როცა დაშორდნენ, ბიჭი ხუთი წლის იყო. ის და მისი უფროსი ძმა დედასა და მამას შორის იხლიჩებოდნენ რამდენიმე წელი, სანამ ბოლოს და ბოლოს არ გადაწყვიტეს, რომ მამასთან ეცხოვრათ.

ნაილი სკოლის გუნდში მღეროდა, ბავშვობიდან უკრავს გიტარაზე. თვითონ ამბობს, რომ გიტარა მისი საუკეთესო საშობაო საჩუქარია.

X factor-ზე გასაუბრებისას ჰორანმა თქვა: "მე 16 წლის ვარ და მინდა ისეთივე ცნობილი გავხდე, როგორც ბიონსე და ჯასტინ ბიბერი არიან".

ლუი ტომლინსონი

ლუი უილიამ ტომლინსონი 1991 წლის 24 დეკემბერს დაიბადა დონკასტერში, სამხრეთ იორკშირში. მისი მშობლები გაიყარნენ, როცა ლუი მოზარდი იყო და მამინაცვლის, მარკ ტომლინსონის გვარი მიიღო. მას ხუთი უმცროსი და ჰყავს: მამის და დედის მხრიდან.

ლუი ბარნსლიში სამსახიობო ოსტატობის სკოლაში დადიოდა. პატარა როლიც ჰქონდა ერთ-ერთ ინგლისურ ფილმში.

ლუი ამბობს, რომ მის მუსიკალურ გემოვნებაზე ყველაზე დიდი გავლენა რობი უილიამსმა მოახდინა.

ჰარი სტაილსი

ჰარი ედვარდ სტაილსი 1994 წლის 1 თებერვალს დაიბადა ინგლისის ქალაქ ჰოლმს-ჩაპლში. მას უფროსი და ჰყავს. 7 წლის იყო, როცა მისი მშობლები დაშორდნენ.

სკოლაში თავისი ბენდი ჰყავდა, რომლის სოლისტიც იყო. სწავლა საშუალო განათლების მიღების შემდეგ მიატოვა.

X factor-ში გამოსვლამდე საარსებო ფულის საშოვნელად საფუნთუშეში მუშაობდა.

ამბობს, რომ ბავშვობიდან უყვარდა სიმღერა და მასზე გავლენა მოახდინა ელვის პრესლის შემოქმედებამ.

ზეინ მალიკი

ზეინ ჯავად მალიკი 1993 წლის 12 იანვარს დაიბადა ბრედფორდში, ბრიტანულ-პაკისტანურ ოჯახში. მუსლიმანია, ნახევრად პაკისტანელი, მეოთხედით ინგლისელი და მეოთხედით ირლანდიელი. სამი და ჰყავს.

ამბობს, რომ შერეული სისხლის გამო სკოლაში თანატოლებთან ურთიერთობა უჭირდა. თუმცა მოზარდობის ასაკში ამაყობდა კიდეც თავისი წარმომავლობითა და განსხვავებული გარეგნობით.

შოუში მონაწილეობის დროს გარდაეცვალა პაპა. მის პატივსაცემად მისი სახელი ამოისვირინგა მკერდზე, არაბულ ენაზე. სულ ზეინს 24 ტატუირება აქვს. მუსიკაში ქუჩურ სტილს ანიჭებს უპირატესობას, შთაგონებას კი მაიკლ ჯეკსონი და აშერი ანიჭებენ.

ჟურნალი "რეიტინგი"

(გამოდის ორშაბათობით)

სალომე ჭაჭუა უცხოეთში მიემგზავრება - რომელი ქვეყნის "ცეკვავენ ვარსკვლავებში" გამოჩნდება მოცეკვავე

"სადაც არ უნდა ყოფილიყო, ყოველთვის სახლში ბრუნდებოდა... თბილისში..." - რას წერს გენიალურ კომპოზიტორზე ხელოვნებათმცოდნე

„თბილისური ჩუქურთმა“ - იმპრესიონისტი მხატვრის გამოფენა, რომელიც თბილისობას ეძღვნება