როგორ ემზადებიან ვარსკვლავები "ოსკარისთვის"

ჰოლივუდის ყველა ვარსკვლავი "ოსკარის" ცერემონიამდე რამდენიმე კვირით ადრე იწყებს თავის მოვლას. ბოლო დროს პოპულარობა ალოეს ექსტრაქტზე შექმნილმა სასმელმა მოიპოვა, რომელიც საჭმლის მომნელებელ სისტემაზე დადებითად მოქმედებს. თუმცა მზადება კინოსამყაროს მთავარი მოვლენისთვის მხოლოდ ამით არ შემოიფარგლება.

სახე:

პილინგი, ინექციები, ლაზერული გაპრიალება - ვარსკვლავები თანამედროვე კოსმეტოლოგიის ყველა შესაძლო ხერხს მიმართავენ, რათა ფოტოგრაფების ახლო კადრებში, მათი სახე ლამაზად გამოიყურებოდეს. ისეთი ვარსკვლავები, როგორებიც არიან ტილდა სუინტონი, ქეით უინსლეტი და სხვები, ექსკლუზიურ პროცედურებს იტარებენ ლოს-ანჯელესის სალონში. ამ პროცედურებიდან ერთ-ერთი სახის სპეციალური ელექტროხელსაწყოთი დამუშავებაა, რომელიც კანის სტიმულირებას ახდენს. უამრავი ჰოლივუდელი კოსმეტოლოგი ვარსკვლავებს ხელით დამზადებულ საცხებს სთავაზობს. ზოგიერთი მათგანი სახის კანის ქირურგიული გადაჭიმვის ეფექტსაც კი იძლევა.

ვარცხნილობა:

თავდაპირველად თმის ღერების აღდგენაზე რამდენიმე კვირა იხარჯება: ნიღბები, ნიღბები და კიდევ ერთხელ ნიღბები, რომლებიც თმის გამაჯანსაღებლად და დასარბილებლად საჭირო ელემენტებს შეიცავენ (ზოგიერთი მათგანი ათასობით დოლარი ღირს და ექსკლუზიურია). ვარსკვლავები თავის კანის მასაჟებსაც იკეთებენ. შემდეგ დგება თმის შეჭრის დრო - ჰოლივუდში ვარსკვლავებს მათი საყვარელი სტილისტები ჰყავთ. მათ შორის არიან ადამ კემპბელი, რომელიც მუშაობდა ანჯელინა ჯოლისთან, ჯენიფერ გარნერთან და ნიკოლ კიდმანთან. ზოგიერთი ცნობილი ადამიანი როზანო ფერეტის სალონში მოსახვედრად იბრძვის, სადაც ნებისმიერი სახის ვარცხნილობა 3000 დოლარზე ნაკლები არ ჯდება. ამ სალონის ხშირი სტუმრები ლედი გაგა და შერონ სტოუნი არიან.

სხეული:

პირველ ყოვლისა სხეული უნდა იყოს გამხდარი. ამისთვის ვარსკვლავები მთელი დღეების განმავლობაში იოგაში, სირბილსა და ზოგიერთი კრივშიც კი ვარჯიშობენ, თუმცა ეს საკმარისი არ არის. ამ კუთხით ჰოლივუდის ბოლო ტრენდი Pilates Reforme-ის ტრენაჟორია, რომლის ფანებს შორის ჯორჯ კლუნიც კი არის. ამ ტრენაჟორს მუცელი და პრესი იდეალურ ფორმაში რეკორდულ დროში მოჰყავს.

გარდა ამისა, ვარსკვლავები იცავენ დიეტებს და ლიტრობით სვამენ მწვანე ჩაის.

ბოლოს, როდესაც კაბის ყველაზე პატარა ზომაში ჩასატევად, რამდენიმე ზედმეტი სანტიმეტრის მოშორებაღა რჩებათ, ვარსკვლავები საიდუმლო იარაღს მიმართავენ - კანის ეთერზეთებით, წყალმცენარეების ექსტრაქტებითა და კოფეინით დამუშავება და ინფრაწითელი დათბობის გამოყენება - ყველაფერი ეს ერთად აღებული, ცელულიტის მოშორებას, ნივთიერებათა ცვლის გაუმჯობესებას და რაც მთავარია, წელის გარშემოწერილობის შემცირებას უწყობს ხელს.

თუმცა სხეული - ეს ჯერ კიდევ ყველაფერი არ არის. იდეალურად უნდა გამოიყურებოდეს თავად კანი. კანი უნდა ბრწყინავდეს! ნარუჯზე უარს ამბობენ ენ ჰეთევეი, რუნი მარა და ემა სთოუნი, თუმცა მისი ერთგული დღემდე რჩება ცნობილი მსახიობი ევა ლონგორია, რომელიც ხელოვნურ ნარუჯს ლოს-ანჯელესის ყველაზე პოპულარულ სალონში იკეთებს. ჯესიკა ბილი კი კოფეინის სკრაბს იყენებს.

გამოსვლის წინ:

და ბოლოს, როდესაც სახეზე უკვე არის მაკიაჟის რამდენიმე ფენა, რომლის მოშორება თავად ქარიშხალ სენდისაც კი არ შეუძლია, ვარცხნილობა იდეალურ ფორმაშია, ხოლო სხეული პატარა ზომის კაბაშიც კი ეტევა - დროა თავად კაბა შეირჩეს! "ოსკარის" წითელი ხალიჩისთვის განკუთვნილი სამოსი უნიკალური უნდა იყოს.

და ბოლო მნიშვნელოვანი დეტალი ღიმილის რეპეტიციაა - რომლითაც ლიმუზინიდან გადმოსული ვარსკვლავი ფოტოგრაფების არმიას უნდა შეხვდეს!

მომზადებულია spletnik.ru-ს მიხედვით.