რას ურჩევენ მეგი გოგიტიძე და ირინა ბაირამაშვილი ერთმანეთს

რას ურჩევენ მეგი გოგიტიძე და ირინა ბაირამაშვილი ერთმანეთს

ცოტა ხნის წინ ირინა ბაირამაშვილმა და მეგი გოგიტიძემ დუეტი ჩაწერეს. როგორც თავად გვითხრეს, დიდი ხანია, მეგობრობენ და სიმღერა, რომელიც მსმენელმა მალევე შეიყვარა, ერთად ჩაწერეს.

ცნობისათვის, მეგის საკუთარი ბენდი ჰყავს; აქვს ხმის ჩამწერი სტუდიაც. სიახლე კი ის გახლავთ, რომ გოგონები მალე მოსკოვში გაემგზავრებიან, სადაც საინტერესო გამოსვლები აქვთ დაგეგმილი.

ირინა:

- ბავშვობიდან რობერტ ბარძიმაშვილის სტუდიაში დავდიოდი. მოგეხსენებათ, საგარეჯოში ვცხოვრობ და დედა იქიდან თბილისში მატარებდა ხოლმე. გარდატეხის ასაკში სიმღერა შევწყვიტე, თუმცა გემოვნებიანი მუსიკის მოსმენა ყოველთვის ძალიან მიყვარდა. საზოგადოებამ "ჯეოსტარიდან" გამიცნო. ბოლოს, როგორც იცით, "ახალ ხმაში" ვმონაწილეობდი.

მეგი:

- დიდი ხანია, ვმღერი. 16 წლიდან ბენდთან ერთად ვმუშაობ. ჩვენ ახალ-ახალ სიმღერებს ვქმნით, ეს პროცესი კი ძალიან საინტერესოა.

- ბენდთან მუშაობა ქართველი მომღერლისთვის ფუფუნებაა. შენ როგორ მოახერხე ბენდის ჩამოყალიბება?

- რა თქმა უნდა, ამ ყველაფერს თან სდევდა გარკვეული პრობლემები. როგორც გითხარით, დიდი ხანი მოვანდომე ბენდის საბოლოო დაკომპლექტებას. ვიდრე ეს მოხდებოდა, ჩვენი ბენდიდან ძალიან ნიჭიერი ადამიანები წავიდნენ, რადგან მუსიკალური თვალსაზრისით ერთმანეთს ვერ ვეწყობოდით. უფლის წყალობით, ახლა ვიპოვე ის ადამიანები, რომლებთან ერთადაც ახლა ნაყოფიერად ვმუშაობ. ჩემ გარდა, ბენდში ოთხი წევრია. ჩვენ 10 მაისს მოსკოვში მივდივართ. რეჟისორმა ჟენია კურინმა ჩვენს სიმღერებს მოუსმინა და შემოგვთავაზა, მისი ფილმის პრემიერაზე ვიმღეროთ. 20 მაისს კი ჩვენი კონცერტია დაგეგმილი. კიევიდანაც გვაქვს მოწვევა. უნდათ, რომ მუსიკალურ ფესტივალში მივიღოთ მონაწილეობა. დიდი გეგმები მაქვს ჩემს ბენდთან ერთად. სხვათა შორის, ვიდრე მოსკოვში წავალთ, 2 მაისს ქუთაისში, ღია ცის ქვეშ გვექნება კონცერტი.

- ირინა, "ახალი ხმის" შემდეგ თუ მიიღე რაიმე ხელსაყრელი შემოთავაზებაsalesland.ge - ფასდაკლებების სამყარო!?

- ახლა ცუდი პერიოდია იმ მხრივ, რომ კონცერტებს იშვიათად მართავენ, მაგრამ როცა ვიღაც ღონისძიებას ატარებს, საქველმოქმედოა თუ არასაქველმოქმედო, ყოველთვის მეძახიან. მიხარია, რომ ხალხს ვახსოვარ. სამწუხაროდ, ზარმაცი გახლავართ. მუდამ ძიების პროცესში ვარ - არ ვიცი, რა მინდა. ორი წლის განმავლობაში ბენდი მეც მყავდა და ჩვენ ბარებში ვმღეროდით, მაგრამ ახლა მინდა, მუსიკა თავად შევქმნა. სხვათა შორის, მეგი წერს მუსიკას, რაც ვფიქრობ, ძალიან მაგარია, ეს ღვთისგან ბოძებული ნიჭია... გეტყვით იმასაც, რომ საგარეჯოში საკუთარი მუსიკალური სტუდია მაქვს და მინდა, ასეთივე სტუდია თბილისშიც მქონდეს. თუ ამ ჩანაფიქრს განვახორციელებ, ჩემს სტუდიაში აუცილებლად, ვოკალის პარალელურად მსურველებს სასცენო ხელოვნებას, მეტყველების კულტურასა და ქორეოგრაფიასაც ვასწავლით.

მინდა, მომავალი საქმიანობა მთლიანად მუსიკას დავუკავშირო. ადრე საგარეჯოს მუნიციპალიტეტში ვმუშაობდი. დროთა განმავლობაში მივხვდი, რომ იქ ჩემი ადგილი არ იყო და ამიტომაც, სამსახურს ხშირად ვაცდენდი. ამის გამო გამიბრაზდნენ და დამითხოვეს.

- ალბათ, მშობლები ხელს გიწყობენ მუსიკალური კარიერის აწყობაში, არა?

- დედას უნდოდა, ისეთი სამსახური მქონოდა, სადაც სტაბილური შემოსავალი მექნებოდა. თუმცა, იმასაც ხვდება, რომ სიმღერის გარეშე ცხოვრება არ შემიძლია. ჰოდა, ახლა წარმატების მიღწევაში შეძლებისდაგვარად მიწყობს ხელს.

მეგი:

- დედაჩემს უნდოდა, იურიდიულზე ჩამებარებინა. ასეც მოხდა, მაგრამ პირველი კურსი დავხურე თუ არა, საბუთები გამოვიტანე და თეატრალურ უნივერსიტეტში ჩავაბარე. მსახიობობა ძალიან მომწონს. მშობლები ყველაფერში ხელს მიწყობენ.

- რომელიმე სატელევიზიო მუსიკალურ პროექტში მონაწილეობის სურვილი არ გქონია?

- "ვარსკვლავების აკადემიაში" ვმონაწილეობდი. გახსოვთ ალბათ, შენობის ჩამონგრევის გამო პროექტი რომ შეწყდა. ეს დიდი ხნის წინ იყო და მას მერე სხვა რომელიმე პროექტში მონაწილეობის სურვილი არ გამჩენია - ასეთი შოუების ფორმატი "ჩემი" არ არის. არც ტელევიზიით მოპოვებული პოპულარობა მხიბლავს; ამის გარეშეც ძალიან ბევრი ადამიანი მიცნობს და მისმენს. Night office-ში გვქონდა კონცერტი და 2 000 კაცი მოვიდა.

ირინა:

- მეგის ვეთანხმები: პოპულარობის მოპოვება ამ გზით ჯობს, ვიდრე - ტელევიზიით. მგონია, რომ ჩემი მსმენელი ცოტა არ იყოს, გავაღიზიანე. ოთარ ტატიშვილი მეუბნებოდა: პროექტი არ მინახავს, სადაც შენ არ იყავიო. ეს სიზარმაცით მომივიდა; თითქოს, ამ კონკურსებში მონაწილეობით გამოსავალს ვპოულობდი. თანაც - სცენა ძალიან მენატრებოდა, მწყუროდა. ახლა მინდა, სტუდიაში ჩავიკეტო და ვიმუშაო.

მეგი:

- ირინას ყოველთვის ვეუბნებოდი, - ამ პროექტებს მოეშვი-მეთქი. ძალიან კარგად მღერის, კონკურსებში მონაწილეობისას კი გარკვეულ ჩარჩოში უნდა ჩაჯდეს. ირინაც და მეც სიმღერის დროს თავისუფლებას ვანიჭებთ უპირატესობას.

- ერთმანეთი როდის გაიცანით? როდის დამეგობრდით?

- დაახლოებით ხუთი წელია, ერთმანეთს ვიცნობთ. გაცნობის დღიდანვე დავმეგობრდით. ირინა ჩემი დაა.

- სიმღერის ტექსტზე რას გვეტყვით?

- ტერენტი გრანელის, გუჯა ბურდულისა და ჩემი ტექსტი არის გაერთიანებული. ყოველთვის მინდოდა, ეს სიმღერა მე და ირინას გვემღერა, რადგან ვიცოდი, მას აკორდები ყველაზე მეტად მოუხდებოდა. სიმღერა ჩვენს "აი სტუდიოში" ჩაიწერა.

ირინა:

- მეგისთან ჩაწერილი დუეტი ყველას მოსწონს. არ არსებობს, ქალაქში გამოვიდე და ერთმა მაინც არ მითხრას, რომ კარგი სიმღერაა.

- მუსიკალური საქმიანობა თქვენთვის შემოსავლის წყაროს წარმოადგენს?

მეგი:

- ნამდვილად შემოსავლის წყაროა, რადგან კონცერტებზე ხშირად გვეძახიან. ჩვენი ბენდის გამოსვლას ხალხი ყოველთვის ესწრება.

ირინა:

- ის საქმე, რაც გსიამოვნებს და რასაც გულით აკეთებ, შემოსავლის წყაროდ მეტ-ნაკლებად, გამოდგება. როდესაც მეკითხებიან, - რამდენს ვითხოვ იმისთვის, რომ ამა თუ იმ საღამოზე ვიმღერო? - პასუხის გაცემა მიძნელდება და ამ კითხვის ავტორს ვეუბნები: რისი საშუალება გაქვთ-მეთქი?...

მეგი:

- ახლა მოდაშია საქველმოქმედო კონცერტები. ამას წინათ ერთ ასეთ კონცერტზე მივედი და ვიკითხე, - ვის ვეხმარებით-მეთქი? თქვენ წარმოიდგინეთ, ამ კითხვაზე პასუხი მომღერლებსაც არ ჰქონდათ. ასეთი რაღაცები, ხალხის მოტყუება ჩემთვის მიუღებელია.

- სამომავლოდ რა გეგმები გაქვთ?

ირინა:

- მეგი გასტროლიდან რომ დაბრუნდება, ახალ სიმღერებს აუცილებლად ჩავწერთ.

მეგი:

- მანამდე კი ჩემი სიმღერა გამოვა, რომელიც სავარაუდოდ, რადიო "აფხაზეთის ხმაზე" აჟღერდება.

ჟანა გოგინაშვილი

ჟურნალი ”გზა”

(გამოდის ხუთშაბათობით)

სალომე ჭაჭუა უცხოეთში მიემგზავრება - რომელი ქვეყნის "ცეკვავენ ვარსკვლავებში" გამოჩნდება მოცეკვავე

"სადაც არ უნდა ყოფილიყო, ყოველთვის სახლში ბრუნდებოდა... თბილისში..." - რას წერს გენიალურ კომპოზიტორზე ხელოვნებათმცოდნე

„თბილისური ჩუქურთმა“ - იმპრესიონისტი მხატვრის გამოფენა, რომელიც თბილისობას ეძღვნება