რა მსხვერპლის გაღება შეუძლია მსახიობს პოპულარობისთვის

ის გოგონების ყურადღებით განებივრებული გახლავთ და მათგან წერილებსაც ხშირად იღებს. უყვარს ჭამა. ვერ იტანს ქვეწარმავლებს. ოცნებობს ლეკვზე... "დეტექტორის" შეკითხვებს სერიალის - "შუა ქალაქში" პატარა მსახიობი, ფრთხილი და დაკვირვებული რატი გოგატიშვილი პასუხობს.

- ვთქვათ, სცენარის ნაცვლად, სერიალის წარმომადგენლებმა სასწავლად ისტორიის გაკვეთილი მოგცეს...

- ძალიან გამიკვირდება. სიმართლე გითხრათ, სწავლა დამეზარება, მაგრამ მაინც ვისწავლი.

- სცენარის სწავლა არ გეზარება?

- არა. სხვათა შორის, სცენარს გადასაღებ მოედანზე გვაძლევენ და იქვე ვსწავლობ.

- ყველაზე მეტად, რისი საგნის სწავლა არ მოგწონს?

- ჭადრაკის სწავლის პროცესი არ მომწონს. ასეთ დროს ხომ ძირითადად, თეორიას გვასწავლიან, თამაშს კი მხოლოდ რამდენიმე წუთს ვუთმობთ.

- უჩინმაჩინი რომ იყო, რას მოიმოქმედებდი?

- რესტორნებს დავივლიდი და სტუმრებს შეკვეთილ კერძებს შევუჭამდი (იცინის).

- ჭამა ძალიან გიყვარს თუ უბრალოდ, ხალხის რეაქცია უფრო მეტად გაინტერესებს, როცა მათი თეფშებიდან საკვები გაქრება?

- მსუნაგი ვარ, მაგრამ ხალხის რეაქციაც საინტერესო იქნება (იცინის).

- ვთქვათ, სერიალის წარმომადგენლები დიეტის დაცვას გთხოვენ...

- დავიცავ!

- ვთქვათ, დავით გოგიჩაიშვილი გიბარებს და გეუბნება, რომ შენმა პატარა დაიკომ მთელი გადამღები ჯგუფი სასტიკად სცემა და არ სურთ, ასეთი საშიში გოგონას ძმასთან თანამშრომლობა...

- რა გაეწყობა? შინ წამოვალ, მერე კი დაიკოს დავსჯი.

- გამორიცხავ, რომ შეიძლება, დავით გოგიჩაიშვილი ხუმრობდეს?

- უჰ, რას ამბობთ? თქვენ ჩემს დას არ იცნობთ (იცინის)! ძალიან ცელქია. ამას წინათ ღობეზე ძვრებოდა და ფეხი დაიშავა, ახლა ნაკერი ადევს.

- რძე სინამდვილეშიც არ გიყვარს?

- რძის პროდუქტები მიყვარს, მაგრამ რძის დალევა - არა.

- ვთქვათ, რძის სარეკლამო სახედ აგირჩიეს და კლიპში გადასაღებად მიგიწვიეს. გადაღებისას კი რძის დალევაც აუცილებელია.

- დავთანხმდები. რძეს ნაძალადევად დავლევ, სამაგიეროდ - პოპულარული გავხდები.

- პოპულარობა გაკლია?

- არა, მაგრამ კიდევ უფრო მეტად პოპულარული ვიქნები...

- ბევრი დუბლის გადაღება და შესაბამისად, ბევრი რძის დალევა რომ დაგჭირდეს?

- არა უშავს, დავლევ.

- ვთქვათ, სერიალში პაატას როლის შემსრულებელმა - ნოდარ გურგენაშვილმა დაბადების დღეზე თხა გაჩუქა...

- თხას სოფელში წავიყვან, მოვუვლი. მერე თხის რძეს გავყიდი (იცინის).

- ნოდართან როგორი ურთიერთობა გაქვს?

- ვმეგობრობთ. მხიარული ადამიანია, მაგრამ რეალურად, თხა რომ მაჩუქოს, გამორიცხულია!

- შანსი რომ გქონდეს, 1 დღით რომელ არსებად გადაიქცეოდი?

- ძაღლად ან ჩიტად: ძაღლის თვალით დანახული სამყაროც საინტერესო იქნება და ფრენაც.

- ვთქვათ, გამოცდაზე შეგხვდა ასეთი საკითხი: "ქალთა სახეები სერიალში - "შუა ქალაქში"...

- გამიხარდება. იქვე მოვიფიქრებ რამეს და გამომცდელს გავაკვირვებ (იცინის).

ეთო ყორღანაშვილი

ჟურნალი ”გზა”

(გამოდის ხუთშაბათობით)