თურქეთის საგარეო საქმეთა მინისტრი ქვეყანაში მიმდინარე მოვლენებზე მსოფლიოს რეაქციით უკმაყოფილოა
თურქეთის საგარეო საქმეთა მინისტრი, აჰმედ დავუთოღლუ თურქეთში მიმდინარე მოვლენებთან დაკავშირებით მსოფლიო თანამეგობრობის რეაქციით უკმაყოფილოა. როგორც თურქული საინფორმაციო სააგენტო Anadolu დიპლომატიურ წყაროზე დაყრდნობით წერს, თურქეთის საგარეო უწყების პირველ პირს სატელეფონო საუბარი ჰქონდა ამერიკის შეერთებული შტატების სახელმწიფო მდივანთან, ჯონ ქერისთან, სადაც დავუთოღლუმ საერთაშორისო თანამეგობრობის რეაქცია გააკრიტიკა.
სააგენტოს ინფორმაციით, ეს საუბარი მას შემდეგ შედგა, რაც რამდენიმე ამერიკელმა დიპლომატმა თურქეთში მიმდინარე მოვლენებთან დაკავშირებით მკვეთრი განცხადება გააკეთა.
დავუთოღლუ მიიჩნევს, რომ "ძალიან ბევრ დემოკრატიულ ქვეყანაში ხდება მსგავსი გამოსვლები და ეს შეიძლება ჩაითვალოს, როგორც გამოცდა ქვეყნის დემოკრატიული სისტემის".
თურქეთის საგარეო საქმეთა მინისტრმა უკმაყოფილება გამოთქვა იმის გამოც, რომ როდესაც მსოფლიოს სხვა ქვეყნებში ანალოგიური რამ ხდება, ეს განიხილება, როგორც ჩვეულებრივი მოვლენა, ხოლო თურქეთში მიმდინარე მოვლენებს აღიქვამენ, როგორც საგანგებო ვითარებას.
"თურქეთი არ შეიძლება ჩაითვალოს მეორეხარისხოვანი დემოკრატიის ქვეყნად", - აცხადებს დავითოღლუ.
თურქეთში 28 მაისს დაწყებული საპროტესტო გამოსვლები, რომლის მთავარი მოთხოვნა სტამბოლში, ტაქსიმის მოედანზე "გეზი პარკის" რეკონსტრუქციისა და მის ადგილზე სავაჭრო ცენტრის აშენების შეჩერება იყო, ქვეყნის მასშტაბით მასობრივი არეულობა გამოიწვია. დაშავებული და დაკავებულია ათასობით ადამიანი.
დემონსტრანტები რეჯეფ თაიფ ერდოღანის გადადგომას ითხოვენ, თუმცა პრემიერი პოზიციების დათმობას არ აპირებს.
თურქეთში აქციების დროს პოლიციის არაადეკვატური ქმედებები მკვეთრად გააკრიტიკეს ამერიკის შეერთებულმა შტატებმა და ევროკავშირმა.
9 წლის გოგონებს ერთი საათით "ათხოვებენ" - ჟურნალისტებმა ერაყში შემზარავი მასალა გადაიღეს
მოსკოვში ხანძარს 4 ბავშვი ემსხვერპლა - "უყურადღებოდ იყვნენ დარჩენილი, რადგან დედა ან მეზობელთან იყო გასული, ან ნასვამს ეძინა"
