ჯეიმს კამერონმა სტუდიები 3D ფილმების გადაღების გამო გააკრიტიკა

რეჟისორმა ჯეიმს კამერონმა ის სტუდიები გააკრიტიკა, რომლებიც ფილმებს 3D ფორმატში უშვებენ. ამის შესახებ The Film Stage-ი იტყობინება. ეს განცხადება რეჟისორმა მექსიკაში, TagDF-ს ფორუმზე გააკეთა.

კამერონის თქმით, ზოგიერთ რეჟისორს არ უყვარს 3D ფორმატზე მუშაობა. მიუხედავად ამისა, ისინი იძულებულნი არიან გადაიღონ სტერეოსკოპული ფილმები, ვინაიდან ამას სტუდიები ითხოვენ, რომლებიც 3D-თი მოგების ნახვით არიან დაინტერესებულნი.

კამერონის თქმით, "რკინის კაცი 3" და "ფოლადის ადამიანი" თავისუფლად შეეძლოთ 2D ფორმატში გადაეღოთ.

"თუ 150 მლნ დოლარი სპეცეფექტებზე დახარჯეთ, თქვენი ფილმი ისედაც შთამბეჭდავი გამოვა", - განაცხადა რეჟისორმა.

ჯეიმს კამერონის ბოლო ნამუშევრის, "ავატარის" ბიუჯეტი 273 მლნ დოლარი იყო. სურათი 3D ფორმატშია გადაღებული, თუმცა "ავატარს" სწორედ ამ ფორმატისთვის განკუთვნილი სპეციალური კამერებით იღებდნენ.

რაც შეეხება "რკინის კაც 3-ს" და "ფოლადის ადამიანს", ისინი 2D-ში გადაიღეს და შემდეგ გადაიყვანეს სტერეოსკოპულ ფორმატში.

მომზადებულია The Film Stage-ის მიხედვით.