MTV Video Music Awards-ის ტრიუმფატორი ჯასტინ ტიმბერლეიკი გახდა

ტელეარხმა MTV-მ კვირას საუკეთესო მუსიკალური ვიდეოკლიპებისთვის ჯილდოები გასცა. MTV Video Music Awards-ის ცერემონია სპორტულ-გასართობ ცენტრ Barclays-ში გაიმართა.

ყველაზე პრესტიჟულ კატეგორიაში - "წლის საუკეთესო ვიდეო" ამერიკელმა მომღერალმა ჯასტინ ტიმბერლეიკმა კლიპით "Mirrors" გაიმარჯვა. ამ კატეგორიაში ტიმბერლეიკის მეტოქეები იყვნენ: Grammy-ის მფლობელი ბრუნო მარსი (სიმღერა "Locked Out of Heaven"-ზე შექმნილი კლიპით), ახალგაზრდა ქანთრი-მომღერალი ტეილორ სვიფტი ("I Knew You Were Trouble"), რობინ ტიკი ("Blurred Lines") და რეპერ ბენ ჰაგერტისა და დი-ჯეი რაიან ლიუისის დუეტი ("Thrift Shop").

რეპერ Jay-Z -ისთან ერთად გადაღებულმა ტიმბერლეიკის კლიპმა "Suit & Tie" ნომინაციაში "საუკეთესო რეჟისურა" გაიმარჯვა. ჯილდო "ქალის საუკეთესო ვიდეოსთვის" ტეილორ სვიფტმა ("I Knew You Were Trouble") მიიღო. გამარჯვება ნომინაციაში - "მამაკაცის საუკეთესო ვიდეო" ბრუნო მარსმა ("Locked Out of Heaven") მოიპოვა.

"საუკეთესო პოპ-ვიდეოდ" სელენა გომესის კომპოზიცია "Come and Get It" აღიარეს. ჰიპ-ჰოპის შემსრულებელთა შორის საუკეთესო ბენ ჰაგერტის და რაიან ლუისის დუეტი ("Can't Hold Us") გახდა. წელს საუკეთესო როკ-ვიდეო ჯგუფმა Thirty Seconds To Mars-მა გადაიღო.

შოუ ეპატაჟურმა პოპ-მომღერალმა ლედი გაგამ სიმღერა Applause-ით გახსნა. ცერემონიაზე ტიმბერლეიკმა რამდენიმე სიმღერა შეასრულა. მას თანამედროვე მუსიკალური ვიდეოების განვითარებისთვის მაიკლ ჯექსონის სახელობის სპეციალური ჯილდო "Video Vanguard"-იც გადასცეს.

ცერემონია პოპ-ვარსკვლავ კეტი პერის გამოსვლით დასრულდა.

MTV Video Music Awards-ის ყოველწლიური დაჯილდოვების ცერემონიას ტელეარხი MTV 1984 წლიდან ატარებს.

მომზადებულია newsru.com-ის მიხედვით.