საგემბანო უპილოტო 2013 წლის ინოვაციად დასახელდა

ამერიკულმა ჟურნალმა Popular Mechanics-მა 2013 წლის ინოვაციური პროექტებისა და მათ ავტორთა ტოპ-ათეული გამოაქვეყნა. რეიტინგში მოხვედრილ სხვადასხვა პროექტებს შორის, მეექვსე ადგილი ამერიკულმა საგემბანო უპილოტო საფრენმა აპარატმა X-47B-მა დაიკავა. შეგახსენებთ, რომ მიმდინარე წლის 10 ივლისს, უპილოტომ ავიამზიდ "ჯორჯ ბუშის" გემბანზე პირველი ავტომატური დაჯდომა შეასრულა.

პროექტი აშშ-ის სამხედრო ფლოტისა და ავიამშენებელი კორპორაცია Northrop Grumman-ის ერთობლივი ქმნილებაა. სპეციალისტები მასზე 2000-იანი წლების შუა ხანებიდან მუშაობენ. პროგრამა საცდელი პროტოტიპის შექმნას ითვალისწინებდა, რომელშიც გამოყენებული ტექნოლოგიები საფუძვლად სამომავლო სერიულ ნიმუშს დაედებოდა. ცარიელი უპილოტო 6,3 ტ-ს იწონის და 2 ტ-მდე შეიარაღება მიაქვს. პროტოტიპების ღირებულების ჩათვლით, პროექტის განხორციელება აშშ-ის ბიუჯეტს 1,4 მილიარდი დოლარი დაუჯდა.

საგამოცდო პროგრამის ფარგლებში, 2013 წლის 14 მაისს უპილოტო ავიამზიდის გემბანიდან პირველად აფრინდა. ამჟამად მისი ინტენსიური გამოცდა გრძელდება. ტესტების შედეგად მიღებულ ცნობებზე დაყრდნობით, 2014 წლისთვის აშშ-ის ფლოტი მოთხოვნებს სერიული უპილოტოსთვის ჩამოაყალიბებს.

საგემბანო უპილოტოს გარდა წლის ინოვაციური პროექტების რეიტინგში წითელ პლანეტაზე გაგზავნილი მარსმავალი Curiosity (ქართულად "ცნობისმოყვარეობა"), DARPA-სა და Google-ის მიერ ერთობლივად შექმნილი ავტომობილების ავტოპილოტი, გადაადგილების შეზღუდული უნარის მქონე ადამიანებისთვის განკუთვნილი ეგზოჩონჩხი Indego და ვირტუალურ რეალობის სისტემა Oculus Rift შევიდნენ.

მოამზადა ნუკრი მგელაძემ lenta.ru-ის მიხედვით.