ვიქტორ იანუკოვიჩის წინააღმდეგ სანქციების გატარების პეტიციას უკვე 100 ათასი ხელმომწერი ჰყავს

თეთრი სახლის ვებგვერდზე განთავსებულ  პეტიციაზე, რომლის ხელმომწერებიც უკრაინის პრეზიდენტის ვიქტორ იანუკოვიჩის წინააღმდეგ სანქციების გატარებას ითხოვენ, უკვე 100 ათასი ხელმოწერაა და განსახილველად აშშ-ის ადმინისტრაციას გადაეცა. ამის შესახებ უკრაინული მედია იუწყება.

"ჩვენ ვერ მივიღებთ, რომ უკრაინის პრეზიდენტი ვიქტორ იანუკოვიჩი და მისი მთავრობა უარს ეუბნებიან უკრაინელ ხალხს დასავლურ ცივილიზაციასთან დაახლოებაში", - ნათქვამია პეტიიციის ტექსტში.

პეტიცია თეთრი სახლის ვებგვერდზე ამ კვირაში განთავსდა და 26 დეკემბრამდე 100 ათასი ხელმოწერა უნდა შეეგროვებინა, რათა აშშ-ის მთავრობას ვიქტორ იანუკოვიჩის წინააღმდეგ სანქციების გატარება განეხილა.

პეტიციის ხელმომწერები აშშ-ის მხრიდან იანუკოვიჩისა და მისი მთავრობის, მათ შორის მათი ოჯახის წევრებისთვის  აშშ-სა და ევროკავშირის ქვეყნებში შესვლის აკრძალვას და უცხოეთში არსებული საბანკო ანგარიშების გაყინვას მოითხოვენ.