ვიქტორ იანუკოვიჩი ოპოზიციას მოუწოდებს რადიკალებს გაემიჯნონ

უკრაინის პრეზიდენტმა ვიქტორ იანუკოვიჩმა ქვეყანაში შექმნილ ვითარებასთან დაკავშირებით განცხადება გააკეთა, რომელსაც მისი ოფიციალური ვებგვერდი ავრცელებს. ოფიციალურ განცხადებაში ვიქტორ იანუკოვიჩი ოპოზიციას მოუწოდებს, გაემიჯნონ რადიკალებს, რომლებიც კიევის ცენტრში შეტაკებებს პროვოცირებენ. ამასთან, როგორც უკრაინის პრეზიდენტის მიერ გავრცელებულ ოფიციალურ მიმართვაშია ნათქვამი, ოპოზიციის ლიდერები ყველა საზღვარს გადავიდნენ, როდესაც ხალხს მოუწოდეს იარაღის გამოყენებისკენ და ამისთვის ყველამ პასუხი სასამართლოს წინაშე უნდა აგოს.

"ისინი საზღვრებს გადავიდნენ, როდესაც ხალხს იარაღისკენ მოუწოდეს. ეს კანონის უხეში დარღვევაა და კანონდამრღვევები სასამართლოს წინაშე უნდა წარდგნენ, რომელიც განსაზღვრავს მათი სასჯელის ზომას. ეს არ არის ჩემი ახირება, ეს ჩემი მოვალეობაა, როგორც კონსტიტუციის გარანტისა - უზრუნველვყო ქვეყანაში მშვიდობა, მოქალაქეების სიმშვიდე და სამართლიანობა თითოეულთან მიმართებაში.

გამომდინარე აქედან, კიდევ ერთხელ მოვუწოდებ ოპოზიციის ლიდერებს, რომლებიც ამტკიცებენ, რომ ვითარების მშვიდობიანი დარეგულირებისკენ ისწრაფვიან, დაუყოვნებლივ გაემიჯნონ რადიკალურ ძალებს, რომლებიც სამართალდამცავ ორგანოებთან შეტაკებებსა და სისხლისღვრის პროვოცირებას ახდენენ. იმ შემთხვევაში, თუ ოპოზიცია არ გამოთქვამს ამის სურვილს, აღიაროს, რომ რადიკალებს უჭერს მხარს და მაშინ მათთან სხვანაირი საუბარი შედგება", - ნათქვამია უკრაინის პრეზიდენტის მიმართვაში.

ამასთან, როგორც უკრაინის პრეზიდენტი აცხადებს, ის დაჟინებით მოითხოვდა, რომ თავი შეეკავებინათ რადიკალური ქმედებებისგან, მაგრამ მას არ გაუგონეს. მისივე თქმით, აუცილებელია საერთო ენის გამონახვა და კომპრომისზე წასვლა, მოლაპარაკებები.

"საპროტესტო გამოსვლების დაწყებიდანვე მე დიალოგის მოწოდებით გამოვდიოდი და ძალადობრივი ვარიანტების კატეგორიული წინააღმდეგი ვიყავი, მითუმეტეს სისხლისღვრის. ეს ჩემი ცხოვრებისეული პრინციპია - არც ერთი ხელისუფლება არ ღირს მისთვის დაღვრილი სისხლის ერთ წვეთად. საჭიროა საერთო ენის გამონახვა, კომპრომისზე წასვლა, მოლაპარაკებები. არაერთხელ მითქვამს, რომ ასეთ შემთხვევაში, შესაძლოა რაღაც დაკარგოს ხელისუფლებამ, რაღაც ოპოზიციამ, მაგრამ მოიგებს უკრაინა", - აცხადებს ვიქტორ იანუკოვიჩი და დასძენს, რომ ჯერ კიდევ არ არის გვიან კონფლიქტის შეჩერება.

"ინტერპრესნიუსი"