"ნაციონალების" სპეციალურად მომზადებული "ქილერები", ნარკოტრანზიტი და უარი იარაღის მოწოდებაზე - პრემიერის მწვავე განცხადებები პარლამენტში

გყავდათ სპეციალურად მომზადებული ჯგუფები - ე.წ. "ქილერები", რომლებსაც თქვენთვის არასასურველი პიროვნებების გასანეიტრალებლად ამუშავდებდით, - ასე მიმართა საპარლამენტო უმცირესობას პრემიერ-მინისტრმა ირაკლი ღარიბაშვილმა საკანონმდებლო ორგანოში გამოვლისას.

როგორც პრემიერ-მინისტრმა აღნიშნა, ახალი ხელისუფლების პირობებში იქნა ბევრი ისეთი დანაშაული გამოძიებული, რომელიც წინა მთავრობის დროს იყო ჩადენილი.

"ყოფილი პოლკოვნიკების, მაიორების და ა.შ. ადამიანების გაუჩინარება, მათი დახოცვა, რომელიც შემდგომ ახალმა ხელისფლებამ გამოიძია ჩემი მინისტრობის დროს. ძალიან მარტივად შემიძლია, კიდევ ერთხელ შევახსენო საზოგადოებას, რომ გყავდათ სპეციალურად მომზადებული ჯგუფები ე.წ. "ქილერები", რომლებსაც ამუშავდებდით თქვენთვის არასასურველი პიროვნებების გასანეიტრალებლად. ეს იყო რეალობა", - მიმართა ღარიბაშვილმა საპარლამენტო უმცირესობის წარმომადგენლს, ირმა ნადირაშვილს.

პრემიერ-მინისტრმა კიდევ ერთხელ აღნიშნა, რომ ახალი ხელისუფლების პრიობებში ძალიან ბევრი დანაშაულის გამოძიება მოხდა.

"სამეგრელოში ჩადენილი უმძიმესი დანაშაულებები. მე ძალიან მიკვირს, თქვენ როგორ ბედავთ სამეგრელოში ჩასვლას. ის ტრაგედია, რაც გადაიტანა ამ რეგიონის მოსახელობამ, საშინელი სტრესის ქვეშ ამყოფებდით არა მხოლოდ სამეგრელოს, არამედ სხვა რეგიონებსაც. ეს არის სწორედ ის მეთოდები, პრაქტიკა და სტილი თქვენი მუშაობის, რომელიც დამკვიდრებული იყო საქართველოში და ჩვენ დავასრულეთ. დიახ, მე ვიყავი მინისტრი, როდესაც ეს უმძიმესი დანაშაულებები გამოვიძიეთ. უნდა გრცხვენოდეთ, როდესაც სუბრობთ და ვითომ იცავთ პოლიციელების ინტერესებს. ჩემზე მეტად ნამდვილად არ შეგტკივათ გული არც იმ სპეცრაზმელებზე, არც იმ პოლიციის, პროკურატურის თანამშრომლებზე, თუ სხვებზე. მე ამის გარანტიას გაძლევთ", - მიმართა ღარიბაშვილმა საპარლამენტო უმცირესობას.

პარლამენტის რიგგარეშე სხდომაზე ღარიბაშვილმა ნარკოტიკული დანაშაულის და ნარკოტრანზიტის წინააღმდეგ ბრძოლაზეც გაამახვილა ყურადღება.

ღარიბაშვილის განცხადებით, გამოკვეთილია სურათი, თუ რა მარშუტით ხდებოდა ნარკოტიკების გადადგილება საქართველოს გამოყენებით.

"ის, რაც მთელი ათი წლის განმავლობაში წინა მთავრობის მიერ იყო გამოვლენილი, 5 კილო ნარკოტიკი იყო. ამ დროს ყოველწლიურად საქართველო გამოიყენებოდა, როგორც ნარკოტრანზიტის ქვეყანა. ამ მიმართულებით წინა მთავრობა აბსოლუტურად არაეფექტური და უუნარო იყო. ჩვენს მიერ, პირველად საქართველოს ისტორიაში, 116 კგ ჰეროინი და 3 ტონამდე თხევადი ჰეროინი იქნა ამოღებული. ეს დაახლოებით ნახევარ მილიარდ დოლამადე ღირებულების ნარკოტიკია. რა თქმა უნდა, სერიოზული მსჯელობის საგანია, რატომ არ ხდებოდა ეს თქვენს დროს - ან უნდა აღიაროთ, რომ იყავით უუნაროები და არაფექტურები ამ მიმართუებით, ან შეიძლება გამოვთქვათ საფუძვლიანი ვარაუდი და ეჭვი, რომ იყო გარკვეული გარიგებაც. ჩემი მინისტრობის დროს დავიწყეთ აგრესიული ბრძოლა ნარკოდანაშაულის - ნარკოტრანზიტის წინააღმდეგ. ჩვენი ეფექტური პოლიტიკის და სწორი მოქმედებების შედეგი იყო ის, რაც გამოვავლინეთ. აქტიურად ვთანამშრომლობთ ამერიკელებთან, ასევე თურქ პარტნიორებთან. გვაქვს გამოკვეთილი სურათი, თუ რა მარშუტით ხდებოდა ნარკოტიკების გადადგილება მათ შორის საქართველოს გამოყენებით", - განაცხადა ღარიბაშვილმა "ნაციონალური მოძრაობის" წევრების მისამართით.

თუ ვინმეს აქვს ილუზია, რომ ამერიკის შეერთებული შტატების პრეზიდენტმა მიხეილ სააკაშვილს აღუთქვა დახმარება იარაღის მოწოდებაზე, ძალიან მწარედ ცდებით, - ასე უპასუხა საქართველოს პრემიერ-მინისტრმა "ნაციონალური მოძრაობის" წევრებს პარლამენტის რიგგარეშე სხდომაზე.

ოპოზიციის წევრები დაინტერესდნენ, რატომ არ გააგრძელა დღევანდელმა ხელისუფლებამ წინა ხელისუფლების დროს აშშ-სთან დაწყებული მოლაპარაკებები საქართველოსთვის საჰაერო თავდაცვითი სისტემების მოწოდების საკითხზე.

როგორც ირაკლი ღარიბაშვილმა განაცხადა, 2008 წლის ომის შემდეგ, ყოფილ პრეზიდენტ მიხეილ სააკაშვილს "მსოფლიო ლიდერები ხელსაც არ ართმევდნენ, იმდენად იყო დისკრედიტებული ამ პროცესების შემდეგ".

"მას პრაქტიკულად აღარ ჩაესვლებოდა ამერიკაში. თუ ვინმეს აქვს ილუზია, რომ ამერიკის შეერთებული შტატების პრეზიდენტმა სააკაშვილს აღუთქვა დახმარება იარაღის მოწოდებაზე, ძალიან მწარედ ცდებით. ეს ილუზია თქვენთვის შეინახეთ. ჩვენ არ გვჭირდება ილუზიებით ცხოვრება და არც ვცხოვრობთ. ჩვენ ვცხოვრობთ რეალობაში", - მიმართა ღარიბაშვილმა უმცირესობის წევრებს.

პრემიერმა მოუწოდა "ნაციონალური მოძრაობის" წევრებს, ტყუილები დაასრულონ. "თქვენ აღარ ხართ ხელისუფლებაში და აღარასოდეს აღარ იქნებით", -განაცხადა პრემიერმა.

ღარიბაშვილის განცხადებით, სწორედ მისმა მთავრობამ დაიწყო პირველად მოლაპარაკებები თავდაცვით სისტემებზე.

"გვაქვს რეალური პერსპექტივები იგივე საფრანგეთთან, რომელიც არ გაჩერებულა, ამას თქვენი და "თავისუფალი დემოკრატების" გასაგონად ვამბობ. არ გაჩერებულა არც ერთი მოლაპარაკება. უფრო გონივრულ პაკეტზე ვყალიბდებით. ასევე აშშ-სთან გვაქვს აქტიური მოლაპარაკებები", - განაცხადა ღარიბაშვილმა. აქვე პრემიერმა აღნიშნა, რომ ამ თემებზე ღიად საუბარი მიზანშეწონილად არ მიაჩნია, თუმცა დაადასტურა, რომ ასეთი მოლაპარაკებები ნამდვილად მიდის.

იხილეთ ასევე:

• ირაკლი ღარიბაშვილი - პარლამენტის ქუთაისიდან თბილისში გადმოტანის საკითხი მომავალი მოწვევის პარლამენტის ფარგლებში შეიძლება გადაწყდეს
• პრემიერის ინფორმაციით, კომპანია "დაგს" ვანო მერაბიშვილის აგარაკის მშენებლობისთვის დახარჯულ თანხას მთავრობა უკან უბრუნებს
• ირაკლი ღარიბაშვილი – პენსიის დოლართან დაკავშირება, არასწორია