ცნობილი ადამიანების ფლეშმობი ფეისბუქზე მას შემდეგ, რაც გრიგოლ ვაშაძემ განაცხადა, რომ არ იცის, ვინ არის გიორგი აბდალაძე

მას შემდეგ, რაც გაერთიანებული ოპოზიციის „ძალა ერთობაშია“ პრეზიდენტობის კანდიდატმა გრიგოლ ვაშაძემ, მიხეილ სააკშვილის პრეზიდენტობის პერიოდში ჯაშუშობის ბრალდებით დაკავებულ ფოტოგრაფთან, გიორგი აბდალაძესთან დაკავშირებით ჟურნალისტებს უთხრა, რომ არ იცის, ვინ არის გიორგი აბდალაძე და რომ ასეთ ადამიანს არასდროს უმუშავია საგარეო საქმეთა სამინისტროში, მის ამ განცხადებას "ფეისბუქზე" ერთგვარი საპასუხო ფლეშმობი მოჰყვა.

• "მას კონფიდენციალურ ინფორმაციაზე ხელი არ მიუწვდებოდა" - რას ამბობდა გრიგოლ ვაშაძე გიორგი აბდალაძის შესახებ 2011 წელს?

„ჩვენ ვიცნობთ გიორგი აბდალაძეს“, - ამ ჰეშთეგით ეხმაურებიან ცნობილი ადამიანები გრიგოლ ვაშაძის რეპლიკას და გიორგი აბდალაძესთან ერთად გადაღებულ, ან ფოტოგრაფის მიერ გადაღებულ ფოტოებს აქვეყნებენ.

• არ ვამბობ, რომ ვაშაძის ბრძანებით მაწამეს, მაგრამ ის ყველაფრის საქმის კურსში იყო - მის სინდისსა და ნამუსზე იყოს, რასაც ახლა ამბობს - აბდალაძე

შეგახსენებთ, რომ ფოტოგრაფები: გიორგი აბდალაძე, ზურაბ ქურციკიძე, ირაკლი გედენიძე და მისი მეუღლე ნათია გედენიძე 2011 წლის 7 ივლისს უცხო ქვეყნების სასარგებლოდ ჯაშუშობის ბრალდებით დააპატიმრეს და გაასამართლეს. 2012 წელს, ნოემბერში, ნათია გედენიძეს ბრალეულობა მოეხსნა.